熊黛林（Lynn）和郭富城被拍得打邊爐「蜜會」，王秀琳（Mango）頓成大輸家！Mango前晚出席活動，雖避談有否與城城聯絡，但就暗寸Lynn：「有聯絡唔代表乜嘢！」
富黛戀升呢浮面，Lynn的城嫂地位被城城默認，曾捲入兩人關係的Mango成為大輸家！不過，前晚Mango為PRIVATE i SALON x NAIL NAIL活動擔任模特兒時，就表現得相當風騷，雖然她刻意避談有否與城城聯絡，但強調兩人仍然保持朋友關係，回應時顯得審慎：「有冇都好，都係朋友，冇所謂！」說罷，她也忍不住爆了一句：「有聯絡唔代表乜嘢！」擺明暗寸早前自台灣打包湯底回港與城城歎打邊爐的Lynn。
G.E.M.變瘦着比堅尼
談到會否抽空欣賞城城擔正的新戲《風雲II》，Mango繼續避談，僅說：「我鍾意彭氏兄弟嘅作品！」被問到城城有否送飛，她就講明會自掏腰包：「我睇嘅話會自己去買飛，買飛都好平啫！」Mango全晚一聞城城二字，即顯得煞有介事，與早前的反應大相逕庭。此外，Mango前晚戴了巨型假髮，更不惜冒犯法之險，她解釋：「因為個假髮太大，我坐的士要彎低身坐，所以扣唔到安全帶，有少少犯法。」不過她笑言好彩身邊有髮型師傍實。
同場的鄧紫棋（G.E.M.）則戴了兩個假髮行騷，又黐了兩對眼睫毛和十隻假指甲，她謂花了兩、三小時裝身，不過完騷後會立即回復真身，她說：「因為我要彈琴，所以唔可以黐假指甲。」此外，G.E.M.透露演唱會後又肥番，笑言若成功瘦身，可以性感形象亮相，但以比堅尼為底線。
阿B愈講愈有味
而同場的鍾鎮濤（阿B）就與司儀王賢誌大講有味笑話，戴了一頭假髮的他被王賢誌指頭髮濃密，阿B搞Gag回應：「最近食咗生髮藥，影響某方面嘅功能，女朋友大咗肚，要撳吓，所以買咗幾樽藥食到搞成咁。」王賢誌笑言：「唔好食咁多，會出更多頭髮！」阿B愈講愈黃色：「會出第二度！」王賢誌則回敬：「嗰度髮型師修剪唔到。」
此外，Mango於活動後即與助手往銅鑼灣醫肚，攻城失敗的她雖被指向寧波車求姻緣，但Mango於席上毫無笑容，又頻托頭一臉落寞，逗留約一小時才離開。
文：名人組