要數近年最具人氣的動畫，《Gundam OO》肯定入三甲，連向來被譽為完美之Perfect Grade（簡稱PG）模型，都將主角機體OO Raiser納入其中。記得對上一隻PG經已是5年前的Strike Gundam（即《Gundam Seed》主角機體），搔咗咁耐癢，新作唔只玩合體咁簡單，連頭燈和太陽爐都跟足動畫閃動綠光，就睇吓模型迷期待已久的PG「靚模」，吸引力能否大過𡃁模年曆。

撰文：鍾鎮科 查詢電話：2433 1828

雙鍋爐閃綠光

今個星期殺出隻二千幾元的OO Raiser模型，單睇標價已比前幾隻PG貴一截，除了因為整個骨架重新設計，加入Swing Mechanic等關節位，組件數目亦出奇地多，淨係架O Raiser輔助戰機，經已有排你砌。最正是連OO Gundam部件都改用嶄新發光系統，頭部射出LED燈之餘，左右肩上的GN Drive太陽爐更識發光轉動，能作180度前後迴轉重現GN粒子化效果。

精細GN部件武器特別多

動畫中OO Gundam改用雙鍋爐後，GN粒子能量過大令機體負荷唔到，所以模型手腳多個關節都變成GN容器儲存過剩粒子，完全忠於海老川兼武老師設定。機體到開發出O Raiser玩合體才能100%發揮威力，因此今次PG由進化前的GN SwordⅡ，到進化後的GN SwordⅢ，甚至紅色超大把Raiser Sword，各階段的武器都有齊，可惜沒有跟紅色透明殼，如果玩埋Trans-AM（粒子極限化變成紅色）肯定更型。

O Raiser戰機完美合體

變形合體向來是模型迷至愛，今次隻O Raiser戰機兩邊機翼可當武器之餘，更附送多件在動畫未曾出現過的導彈配件，包括GN火神炮、GN光束機槍、GN小型飛彈等，當戰機拆開雙翼及屈起後，便可連接高達背部成合體形態，細微位如駕駛艙都郁得，美形與可玩性兼備。傳聞下年將《Gundam OO》搬上大銀幕，希望香港都有得上畫啦。