時裝品牌Lanvin前晚在東京舉行時裝騷，但廣末涼子與中田英壽極低調入場，廣末為免搶品牌風頭，更以私隱理由拒行紅地氈；而同場的胡兵則大方宣布剛失戀，結束兩個月的甜蜜期。

【劉慰思日本直擊】Lanvin前晚時裝騷，吸引日本不少紅人撐場，包括廣末涼子、中田英壽、松雪泰子、桃生亞希子、鈴木亞美和黑田知永子等，內地型男胡兵亦有到場。廣末主演的《禮儀師の奏鳴曲》獲奧斯卡最佳外語片後，帶挈她人氣飆升，前晚她以一身高貴晚裝裙配長boots示人，早早到場坐頭位，但因私隱理由，拒絕傳媒採訪與拍照，寧願專心睇騷。而騷後記者在場內發現廣末身影，舉機影相時她即左閃右避，期間更有四、五名工作人員以手擋鏡頭，表示不可以影相，更要求記者刪除有關照片，曾一度引起混亂。

松雪泰子以連身晚裝示人，高貴又大方。

鈴木亞美以Ｖ領背心連身裙入場，可愛又帶點成熟女人味！

中田英壽走秘道

另外，前國腳中田英壽不知是否要避免被追問與女主播瀧川Christel的緋聞，刻意由秘道入場，不過穿上格仔恤衫、白色褲的中田，在場內與桃生亞希子及男友人言談甚歡，心情沒受影響。

胡兵則稱與品牌設計師Alber Elbaz相熟，故特意捧場，問他會否為Alber充當導遊？胡兵坦言現忙於拍電影，故暫未有時間，希望遲些能有較多休息時間。被問到有否時間拍拖，他大方說：「本來有個，但最近散咗！（工作忙以致分手？）唔係，我唔靚都唔鍾意，靚又好難keep住，因為靚就多人望，而且日本人又開放，點keep喎！不過拍拖好sweet，總之拍咗兩個月都算好長，都唔錯啦！（即係對方太開放所以分手？）日本人係咁，一日未結婚都有權揀，但結咗婚後就會定性。」

中田英壽與身旁的桃生亞希子（左）不時交流意見。

型男胡兵遠赴日本支持好友Alber Elbaz的時裝騷，認真夠義氣。

富永愛定居日本

此外，擔任模特兒的國際名模富永愛，表示現已定居日本，四歲的兒子則正讀幼稚園：「我都係啱啱喺紐約為Phillip Lim行完騷返日本，我依家為咗個仔唔會離開太耐。（囝囝有冇嚟睇騷？）佢依家感冒發燒，要喺屋企休息，其實我都應該戴口罩。」