新一代性感女神美瑾霍絲，早前發表「做戲就好似做妓女」、「米高比爾似希特拉」等驚人言論，她接受訪問時表示只是想搞笑分散注意，而她在新戲《陰點鬼情人》中飾演專食男人的蛇蠍美人，坦言再冇機械人阻住發揮，演技是好是壞，觀眾一睇就知。

記：記者

美：美瑾霍絲

記：你話拍《變形金剛》毫無演技可言，今次拍《陰點鬼情人》係咪可以有得發揮?

美：當然啦！起碼冇機械人轉移咗我嘅演出，我演得好唔好，大家一睇就知!

記：你經常語出驚人，係咪特登要引人注意?

美：首先我唔覺得我講嘅說話達到驚人嘅地步，不過，真相係我唔鍾意講自己嘅事，我嘗試用喜劇方式分散大家嘅注意，好多女星成日長篇大論都係三幅被!

成功突圍而出

記：咁呢種方法成唔成功呢?

美：OK呀!至少能夠喺眾女演員之中突圍而出，當導演想搵演員都會諗吓我，但呢個方法都有弊處，我畀公司警告。自己唔可以犧牲人格嚟換取事業發展機會，只希望做番自己而得到發展。

記：拍《陰》片困難嗎？好多嘢只能憑想像，又要淋到成身血！

美：有道具同實物可以幫我入戲，因為感覺實在啲，我都好享受，不過，亦有好多情緒問題，拍激動嘅場面時大派用場。

記：你個角色係點o架？

美：我演一個專食男人嘅蛇蠍美人，食到男人後就又健康又靚，冇就會變到又醜又恐怖，其實好多女人都係咁，需要男人嚟完美佢哋嘅生命，如果冇咗男友或老公，就會變成女巫咁。

記：聽聞係編劇Diablo Cody欽點你?

美：係呀！唔知佢因乜睇中我，當初睇劇本時覺得有啲吃力，不過愈睇愈享受，仲擔心自己演唔到。

記：雖然係搞笑恐怖片一樣有唔少性感場面。

美：係呀！我同Amanda Seyfried仲有咀嘴戲，不過我覺得好笑多啲。

沙拉保夫吸引

記：講吓八卦嘢先，其實你同沙拉保夫嘅傳聞係真定係假?

美：我覺得佢好吸引，唔知點解覺得佢好有趣，我真係由頭到腳都咁愛佢，不過唔係浪漫或者情慾方面。

記：將來會唔會有小朋友?

美：當然會！我充滿母愛好鍾意小朋友，兩個或者三個就最好，做呢行生細路麻煩啲，又要keep住身材，其實我男朋友（Brian Austin Green）已經做咗爸爸，佢亦係我啲仔女最好嘅爸爸人選。

記：作為新一代性感女神，你最鍾意身體邊部分?

美：肚，因為只有呢個位從來都唔使刻意去做運動整靚佢，唔使練都有六舊腹肌。

記：你認為大家對你最大的誤解是乜野?

美：好多，尤其是以為我好有自信，其實我剛剛相反，所有嘢都會令我覺得冇安全感，好似年紀愈大就愈差，我諗冇得救o架啦!

記：成日畀狗仔隊追住，有乜感覺?

美：當然係討厭啦！我明白係佢哋嘅工作，所以唔可以對佢哋發火。

配角變主角

除了《陰點鬼情人》外，美瑾早前還與Josh Brolin拍了改編自漫畫的英雄電影《Jonah Hex》，雖然只是大配角一名，但美瑾卻成了宣傳海報上的重點，她解釋說：「因為我係戲中唯一女角，所以，咪當咗做女主角囉！」她透露只是用了五天時間完成所有戲份，但付出比兩部《變形金剛》還要多。

登上了荷里活一線女星的美瑾表示，與Josh合作仍然非常緊張，她說：「我只係拍過三部戲，而佢係一位咁出色嘅演員，我要用咗好多氣力嚟控制自己唔好咁緊張。」

文：外娛組