一向熱愛攝影的任達華將於明年在紐約開攝影展，昨日他與劉心悠出席「LG Live Borderless」產品發布會，在場內他展示了四幅將作展覽的攝影作品，任達華說：「明年九月會在紐約開攝影展，為期十日，今次主題係『五季』，靈感源自一年四季，而我所說嘅『五季』係以殘花為主題，我喺花墟攞咗啲人哋唔要嘅花，將佢重新演繹，意思係生命繼續重生，今次會展出60幅作品，現已完成30幅。」

任達華又謂以前一有空閒就會飛往世界各地攝影，但自從女兒出世後，改變想法，他說：「有咗個女後覺得不可以再咁自私，唔會再走去好遠嘅地方影相，寧願喺屋企影花。」任達華對電子產品一向走在前線，他透露家中有十二部電視機，方便隨時睇電視。

而同場的劉心悠表示，任達華是「理想老公」，兩人拍戲曾做夫妻，覺得他對太太無微不至，她說：「佢好照顧身邊人，又不時同囡囡講電話，係個好老公及好爹哋。（如果真係有咁嘅人追求，會否介意年齡差距太大？）年齡唔係問題，當遇到啱，係你就係你。」