有人話，家陣做狗分分鐘歎過做人。自從認識咗小狗Bubble，我終於都信……Bubble係一對姐妹花嘅心肝寶貝，一直享受帝王式生活，食得好、住得靚，經常有靚衫着，有時置裝費仲高達5位數字添。有Pair咁錫自己嘅主人，又真係幾幸福喎！
閃石狗帶搶風頭
年僅9歲嘅Francesca，愛心爆棚，自從收到大家姐送來嘅生日禮物——Bubble，更加視狗狗如己出，即使有工人使喚，仍親力親為照顧愛犬。「自小已鍾意狗仔，既可愛又忠心，遇上Bubble，當然錫到燶，每日都會陪散步，又會親手照顧愛犬嘅起居飲食。為咗幫Bubble扮靚啲，我會上網睇吓有咩寵物新貨、靚貨，睇啱就會買。由於Bubble全身白色，所以買咗好多唔同顏色嘅狗帶嚟配襯，我特別鍾意鑲有閃石、水晶嘅款式，又閃又Sharp，真係搶盡風頭！」
日用品唔貴唔買
Francesca對愛犬從不吝嗇，服飾、食物兜、床仔、玩具等養狗裝備都屬貴價貨。「我相信一分錢一分貨，貴價產品嘅質料始終比較好，好似床仔咁，我買嘅貨色都係外國進口，無論外觀設計、舒適度都比較好啲，Bubble瞓都瞓得舒服啲！其實我咁做都係愛嘅表現，希望畀到Bubble最好嘅生活。」Francesca坦言，多得媽咪背後支持，她才能不斷入貨。「媽咪經常提醒我，物質並唔重要，養寵物最重要係肯付出愛心、耐性，絕不可以3分鐘熱度，所以我決心要照顧牠至終老。」
撰文：司徒德琳
攝影：郭凱敏