久未露面的張天愛（Flora）早前在美國拉斯維加斯籌辦了中華小姐選舉，Flora擔任總監製及策劃，加上參賽者當晚的服裝全由她設計，可謂一手包辦，Flora表示用了六個月時間籌備這大型活動，還邀請了芭蕾舞蹈家譚元元、內地國寶級演員唐國強及王盛德擔任評判，她說：「可以喺美國搞咁大型嘅騷，真係好開心，我嘅目標係除咗中國外，喺外國都能成功，今次算係成功嘅一步。」

Flora又大讚今次參賽者水準高，不但有學歷、有樣貌，還有內涵，令她身為中國人感到驕傲，她說：「今次參賽者水準好高，冠軍個樣好似章子怡，讀MBA、跳拉丁舞又叻。（會否簽佢哋做經理人？）都睇中好幾個，再睇吓點，我唔會亂咁簽人，要簽嘅人除咗樣之外，一定要有腦、有體態美、自律、有修養，我覺得成功嘅人要態度好，對人要真誠。」Flora又表示工作一浪接一浪，將會搞多個有關芭蕾舞的大型騷。