即將攻日的諸葛梓岐，面對兩個勁敵Angelababy與Chrissie（周秀娜）沒有感到畏懼，更坦言自己不會性感行騷，因自己不像Chrissie靠身材上位，要以健康、高貴取勝！

昨日諸葛梓岐到銅鑼灣jft時裝店揀衫，更即場示範品牌Delyle時裝與Duras和服。她接受訪問時表示快將到日本行騷，心情開心多過緊張。問到有否必殺技迎戰Angelababy與Chrissie？她坦言大家風格各不同，只求做好本分，她說：「我啱啱喺夏威夷返香港，冇特別減肥。（Chrissie補鐘行catwalk為攻日作好準備喎！）我真係冇做準備工夫，亦唔怕畀人將我哋比下去，我覺得自己成個人都OK ！」

男友出口術打氣

至於男友有否鼓勵？梓岐甜絲絲笑道：「佢叫我加油囉！（佢會唔會飛過去？）應該唔會，因為佢話唔會！（你會唔會性感行騷？）我之前去咗日本fitting，完全唔性感，只係型同靚，你唔會見到我戴個bra行出嚟！（唔夠Chrissie性感？）佢身材好過我！」

梓岐着起和服，卡娃兒呢！

梓岐將出征日本行騷，更抽時間揀靚裝扮。

爆Chrissie執二攤

其後她又表示不知道Chrissie的性感纖體廣告被禁播，皆因與自己無關，她也不會為錢而着比堅尼示人，言語間指Chrissie執二攤，梓岐說：「公司知我唔接比堅尼job，之前Chrissie嗰間纖體公司搵過我，問我可唔可以着比堅尼？我話唔OK，佢哋又問我係咪價錢問題？我答佢哋係屋企問題！（咁Chrissie咪執你二攤？）唔好咁講！（有七位數字喎！）錢唔係問題！（性感可以令你人氣再高喎？）我唔係靠呢樣！（咁靠乜？）係內同外在美，仲有工作態度囉！（咁你意思係話Chrissie好快紅完？）大家唔同，佢健康嘅 性感，而我健康得高貴！」

文：名人組