上星期Cheaperman勇闖大嶼山水口神秘勝地，掘蜆掘足一日一夜居然一隻都冇收穫，失禮之餘仲好失敗，Cheaperman決定將功補過，今次隻身走訪有香港威尼斯之稱嘅大澳，體驗當地風土民情，Cheaperman更發現大澳水上人以香港為家嘅歷史比新界氏族還要早，堪稱真正原居民。但今日呢個族群彷彿被遺忘了一樣，當地人嘅生活點滴、風俗節慶、服飾飲食以至使用詞語等，都係香港非物質文化遺產嘅一部分，好值得記錄同保存！

第一站：自助導遊了解大澳歷史

Cheaperman入到大澳，喺無導遊嘅情況下，本來都好驚青，點知就係正正畀佢發現，一個稱為「歷史文化室」嘅好地方，仲要完全免費，真係好過跟本地團喎！

呢個免費入場既小型博物館，裏面有好多呈現大澳漁村文化既展品，好似婚嫁中必備嘅椰子，原來係象徵「年生貴子」。除左結婚用品外，仲有當年出海捕魚用具，每件都印證大澳多年嚟漁業發展，相當有歷史價值！Cheaperman最有興趣都係一啲歷史相片，睇住大澳時代變遷原來係咁過癮嘅！難怪大澳又有香港威尼斯之稱啦！假如香港人識好好保護，將來可能成為全球最佳景點之一！

第二站：四面八方體驗風土人情

了解完大澳歷史背景，當然要親身走訪，深入體驗鄉土民情啦！Cheaperman決定醫飽個肚先。嚟到大澳，有乜好食得過海鮮呢？行行吓，就畀佢發現大澳有不少小食檔，其中最吸引嘅就係燒沙白，Cheaperman即時飛身過去試食，即揀即燒，好食都停唔到口！仲要$10有交易，真係抵呀！除此，仲有十幾款當地特產嘅魷魚乾，大中細都有得揀，食味道之餘更感受一份情懷。Cheaperman仲要又食又拎，大手掃咗不少大澳特產，花膠、鹹魚、蝦乾、生晒響螺頭樣樣有。

Cheaperman發現當地不單風景靚、特產多，旅遊一樣咁好玩，就喺碼頭附近，有遊船河服務，行程簡介第一站係暢遊水上棚屋，之後追尋中華白海豚，嘩！價錢都只係每位$30，真係吸引！

HotClick三甲
第一位：飛上海搵「老模」

點解要飛上海搵「老模」？原來係相機LOMO至真！當人人都追求高解像高科技相機，偏偏有人愛玩Low Tech，最近上海就開設全球最大Gallery Store，外形走歐陸風格，佔地過萬呎，樓高六層，底層售賣各式各樣LOMO相機及鏡頭配件，二樓是潮流精品，男女Tee、皮袋等，而最頂兩層就係cafe，潮友一邊歎啡咖，一邊同好交流心得，點會唔係「老模」迷天堂呢？

第二位：Audi A5 Cabriolet 線條明快

A5 Cabriolet那流線而亮麗的線條，除散發時尚、高貴的氣息外，還充分展現出開篷車的美感。不少人認為開篷車不夠實用，A5 Cabriolet的出現卻讓這些人閉嘴，於開篷狀態下，尾廂的空間仍有320L，此外，2.75米長的輪距還營造了闊落的空間感，5呎8吋高的成人在後排也不用屈膝而坐，而且亂流並不嚴重，駕乘感俱佳。廠方表示，A5 Cabriolet的綜合油耗可低至7.7L/100km，行1km只需$1左右。

第三位：親子烹飪就係咁易

細蚊仔揀飲擇食，唔食生果點算好？好簡單，今日就教你整味棉花糖溝新鮮水果甜品。材料方面，首先準備大量水果，例如橙、士多啤梨、水蜜桃、杧果、奇異果及棉花糖，之後逐一將切好嘅水果串上，最後插喺橙上增加立體感，咁就大功告成，放假同囝囝囡囡一齊做，既可享受親子樂，對小朋友又有益，掂呀！

撰文：祖