早前有指謝婷婷因嫌棄同公司的o靚模周秀娜而提前解約，昨日婷婷出席活動時否認其事，強調自己與o靚模市場不同，再者只要有實力，就不怕跟誰一起共事。婷婷來自演藝世家，真金當然不怕洪爐火！

昨日Christian Dior舉行全新Diorskin Nude產品發布會，大會特別請來謝婷婷、Cara G.、「翻版徐子淇」鍾浠文及莊思敏一同出席活動。婷婷被問及解約一事即澄清說：「其實我搵開一個女仔幫我手接job，後來佢要生BB，我就以朋友身份搵阿輝（謝霆鋒前助手，有指是model公司幕後老闆）幫手，根本就冇簽過約，所以冇解約呢回事。（介唔介意與o靚模同公司？）我有我嘅市場，佢哋有佢哋嘅市場，大家都唔同；而且自己做得好，就唔需要擔心同乜嘢人一齊做嘢！總之我同人傾就講明想專注拍戲同model工作。」

Cara G.（左起）、婷婷、Gary、鍾浠文與莊思敏出席化妝品活動。	婷婷與Cara G.作化妝示範。	周秀娜在o靚模行列都算紅得快。（資料圖片）

霆鋒唔想做經理人

對於有指霆鋒自組公司，問婷婷可有興趣加盟？她再澄清說：「阿哥依家做得好開心，日日進步，一啲都唔覺佢想做經理人公司。（咁同阿輝有冇搞得唔愉快？）絕對冇，之前都有喺朋友生日會見到，大家仲傾得好開心，佢都有嚟霆鋒屋企一齊食飯。」

老竇意見勿亂簽約

記者笑問父親謝賢可有給予意見？她笑說：「老竇好錫我，驚我簽咗約之後就好辛苦，所以叫我盡量唔好簽任何嘢！（叫佢做埋經理人？）咁又唔得。（係咪驚你好似阿哥咁簽長約？）阿哥簽約時好細個所以唔同，況且我都大個女，好多嘢都唔需要父母擔心，不過我好尊重佢哋，有乜嘢都會問佢哋意見，我覺得自己好幸福，有事時可以有好多人借個膊頭畀我挨。」

問到男友安志杰有何鼓勵？她即甜笑說：「佢精神上大力支持我，好似如果我第二日要做嘢，之前嗰晚就要我好好休息唔好做嘢，仲會煮飯畀我食添！」

文：名人組