暑假接近尾聲，你的孩子怎度過？Aidan（蔡康年囝囝）的好爸爸便安排寶貝仔學溜冰。「書真係有排讀，暑假好應該輕鬆吓，發掘唔同興趣。學溜冰最緊要唔怕跌，而且每次跌倒要識得爬番起身，有助加強意志力，練習過程更可學懂『一分耕耘，一分收穫』嘅道理……嘩！Aidan，舉高雙手咁大膽，快啲扶實隻企鵝啦！」

灌輸理財概念

雖然經常跟囝囝玩到癲，但蔡康年會跟孩子約法三章。「Aidan很喜歡去xx樂園玩室內機動遊戲，每次我都只會畀佢10個代幣，任佢決定玩邊種遊戲，但玩晒代幣就要一齊返屋企。Aidan明白遊戲規則，自然肯乖乖地跟我走。」

現主持電視節目「創富坊」的蔡康年，不時向囝囝灌輸理財知識，教他如何正確運用金錢。「我替囝囝開咗個戶口，將佢啲利是錢保管住，等佢年紀大啲，就會同佢講：如果要買玩具，就要喺戶口中提款，但錢會愈提愈少，畀佢知道金錢唔係唾手可得。同囝囝行街街，又會搵啲實例作教材，例如佢想買超人玩具，我會話佢知：呢款超人嘅價錢等如一罐奶粉，你要買超人就冇得飲奶，等佢自行取捨，從而明白到要得到某樣嘢，係需要付出的。」

「跌倒要識得爬番起身，學溜冰正正能帶出呢個Message！」蔡康年說。

Aidan每次玩機動遊戲都是自己入錢，從而建立善用金錢概念。

以身作則教仔

蔡康年認為，嬰孩猶如一張白紙，其成長頗受身邊人影響，因此與太太都很着重身教，給囝囝樹立好榜樣。「細路仔好鍾意模仿別人行為，我哋夫婦都好警惕自己嘅言行舉止。例如對待屋企嘅女傭，絕對唔會擺出一副主人姿態，每次吩咐姐姐做嘢，都會唔該前、唔該後，等囝囝知道女傭係家中一分子，唔應該產生階級觀念。」訪問當日，只見3歲的Aidan謙虛有禮，果然教導有方，佩服！

從玩樂中學習

架着粗框眼鏡的蔡康年是100%好爸爸，從不在Aidan面前擺出嚴父模樣，兩父子Friend過打Band。「新一代嘅小朋友愈嚟愈醒目，要教好佢哋，打打鬧鬧已經唔Work，仲可能招致反效果，令小朋友反感，甚至抗拒同父母溝通。所以，我同太太喺Aidan出世時已取得共識，要同佢做Friend，每日都抽時間陪佢傾偈，了解佢嘅想法。我又主張寓學習於娛樂，一邊玩一邊講解人生道理，囝囝學得開心，自己亦教得舒服！」

撰文：司徒德琳　攝影：郭凱敏