蒙嘉慧（YoYo）、姚嘉妮（嘉嘉）因合作拍劇成為好姊妹，但好姊妹未必一定睇法一致或互相影響，嘉嘉與林祖輝結婚生女有個幸福家庭，YoYo與鄭伊健雖然感情穩定，卻未有意思要向好姊妹睇齊。

嘉嘉最愛家庭樂

YoYo與嘉嘉年前合作《爭分奪秒》成為好友，最近兩人又為新劇《ID精英》宣傳。已成為一女之母的嘉嘉，坦言很喜歡這個轉變：「我係鍾意結婚生仔嘅人，因為覺得有安全感，感覺舒服、舒適、好完整。細個好嚮往一家人過family day，尤其是聖誕節喺聖誕樹下圍住火爐，感覺好溫暖，係幸福嘅象徵！所以我係會結婚生仔嗰種人。」

嘉嘉私下雖然會跟YoYo分享家庭樂，但知道對方喜歡四圍遊玩，不是生小朋友的類型。嘉嘉說：「佢識咗鄭生（鄭伊健），戥佢開心，因為搵到個可以夾到嘅男人。我都唔會游說佢結婚，我問過佢結婚嘅嘢啦，佢咪耍我囉！佢唔鍾意結婚生小朋友，最緊要係佢開心，結婚唔一定會開心咗，大家認為開心嘅嘢唔一定一樣。」

YoYo嫌困身拒結婚

嘉嘉無論身在哪裏，總隨身攜帶相機，與朋友分享女兒林煦錡（Kyra）的得意相片。YoYo當然也分享過，為嘉嘉找到幸福感開心。問YoYo有沒有被影響？她即斬釘截鐵說：「我冇佢咁蠢，我唔鍾意咁困身，大家鍾意嘅、需要嘅嘢唔同。」YoYo更稱不會羨慕嘉嘉：「我會戥佢開心，冇話羨唔羨慕，有啲嘢未必適合自己。我鍾意做番蒙嘉慧，結婚太大責任喇，唔諗住！鍾意依家自由自在，都唔排除將來會結婚嘅，人生係要有計劃，但人愈大計劃愈好，就愈有意料之外！兩個人喺埋一齊，最緊要係享受開心過程。」

嘉嘉依賴YoYo統籌

YoYo承認以前也曾想過某些計劃，但目前唯一重要的，是如何好好照顧一直與她生活的年邁婆婆，因她明白與婆婆相處時間無多，每一日都要盡量做到最好。

YoYo和嘉嘉性格可謂一凹一凸，嘉嘉最愛依賴人，最好有人代她安排吃喝玩樂。而YoYo因做過廣告製作，凡事愛親力親為，擔任統籌一角，故深得嘉嘉欣賞。但YoYo坦言不是人人都欣賞她作風，她說：「有啲人會覺得我係霸住做㗎！有啲人會覺得係偽善，所以我依家學識咗要人開口我至幫，因為唔知人點諗。」

歡喜冤家互窒有趣

YoYo與嘉嘉都是牙尖嘴利及動靜皆宜的人，靜時可以一起睇嘉嘉女兒Kyra的溫馨照，動時則互窒對方大笑一番。嘉嘉一時愛寸YoYo冇朋友，一時又詐嬌叫她供Kyra讀書，YoYo聞言扮cool說：「供佢讀屎片呀！」相信互窒已成為這對歡喜冤家的「情趣」。

髮型：John Chung@Headquarters（蒙嘉慧）

化妝：Dephine Chan（蒙嘉慧）

服裝：I.T-Maison Martin Margiela（蒙嘉慧）、De Version（姚嘉妮）

場地：Quarterdeck

文：影視組　攝：林楠