o靚模在動漫節懷疑被鹹豬手，搞到依家乜事都被「實Q」(目及)住，但零零舍舍有個動漫活動，粉絲們1秒唱12次「FXXK」、大叫「Go To DMC！」卻愈玩愈High，原來是日本人氣漫畫《爆粗Band友》原作若杉公德老師首度訪港，動漫迷自然出盡Krauser二世爆粗加不文絕技，即場Cosplay唱歌、表演牙齒掃結他等，迎接這位爆粗Band神。

漫畫銷量達400萬本

上年《爆粗Band友》風靡全球，單是漫畫銷量已達400萬本，電影一開畫即破千萬票房，最深刻當然是松山研一（即《死亡筆記》的L）飾演純情牛蒡男，誤打誤撞變為地下爆粗樂隊DMC主音Krauser二世，抵死搞笑兼不文。今次邀請到若杉老師參與動漫節，身為粉絲的小記當然第一時間支持，更有DMC狂迷組隊表演和舉牌拎簽名，全場大叫「Go To DMC！」勁熱鬧。

唔想畀你隊：「《爆粗Band友》反映好多香港人的生活，睇完之後好有共鳴！」	魔王隊：「佢唔單止係一本搞笑漫畫，仲幫人發洩到心中的不滿。」	[DETROIT METAL CITY](c) KIMINORI WAKASUGI/HAKUSENSHA,INC. TOKYO.

現實與理想的掙扎

原以為若杉老師會好似Krauser二世咁出位，點知問佢有關粗口內容完全唔答，老師都怕醜話：「漫畫中的根岸（牛蒡男）較能反映自己的性格。」當年大學畢業後做過居酒屋兼職，又做過5年漫畫助理，對現實感到不滿同時，對漫畫理想仍充滿期望，於是便嘗試以自己喜歡的音樂，融入各種搞笑題材，讓一個想做民歌手的牛蒡男，被迫化身成惡魔唱重金屬歌曲。

I Love DMC隊：「很少漫畫有類似的主題，覺得DMC夠晒特別兼搞笑。」	若杉老師外表有幾分牛蒡男的影子，佢自己都話較似主角根岸的性格。	老師雖然答問題都係一句起兩句止，但畫爆粗Band友和用毛筆簽名就相當熟手。

笑料出位才有共鳴

漫畫中身為處男的主角被誤以為強姦東京鐵塔、1秒鐘講12次FXXK等，現實根本冇可能發生，老師表明笑料要夠出位才能將意念表達出來，而每期笑位亦是最難諗的地方。至於怕唔怕教壞細路呢？「其實主角內心係叫人唔可以咁樣做，有強烈的對比才能令人會心微笑。」難怪一眾日本女星如小天后木村Kaela、玉女長澤正美等都係《爆粗Band友》粉絲。

撰文：鍾鎮科 攝影：郭凱敏