「Monster Hunter」有幾勁唔使講，好似昨日先正式推出的「Monster Hunter 3」，由PS平台轉到去Wii，未出街前日本的出貨量都過百萬，真係威到盡。新一集最好玩之處當然係可以將Wiimote當成太刀，見到惡龍狂Fing手掣喪劈，投入感極強；而今集更誇到可以潛落水底劈海龍，每日花唔使兩蚊就可連線任玩，匿埋屋企開行冷氣組隊打惡龍，爽！

獵僮幫手煮飯

雖然用今次Wii版本跟之前的PS2或PSP相比唔公平，但「Monster Hunter 3」的畫面表現總算有交代，村落、農地甚至怪獸的外觀都好過以前唔少。整體遊戲玩法冇大變，都係接任務打怪獸、打龍，打完賺到錢可以走去升級武器，又或者將執到的素材加錢組成新武器，新意唔大但就好得機迷嘅心。至於PSP版上的農場都可以在「Monster Hunter 3」搵到，種菜之外，仲有機會收成特別物件。另外，今集仲加入「獵僮」角色跟出跟入，當戴上唔同面具時會有唔同能力，有心的話仲可作重點栽培，而佢最叻係識得幫你煮埋飯，打龍後都唔怕餓親。

體感玩法先夠Feel

「Monster Hunter 3」係唔係一定要用Wiimote兼體感形式去玩？其實唔係，用Classic手掣一樣玩得，好似遊戲特別版便送上黑色或白色Classic手掣，但係唔少攻擊動作都需要配合Wiimote手掣的轉動方向及時間性先能夠出招，又或者駁招，用Classic手掣就玩唔到。無可否認，體感打惡龍確實幾攰，但真係用手狂劈的感覺就點都好過狂㩒「A」掣。

每日兩蚊連線打

每集「Monster Hunter」都會有新龍登場，今集最出位新龍係海龍拉基亞克爾斯。其外觀似長頸龍，加上一身鱗甲和血盆大口，一出場已甚有霸氣，而且攻擊招式又多又強，身體可以放電之外，亦識吐出電波同用又大又長的尾巴攻擊，更煞食係水中移動速度極快，唔約埋三五個獵人落水打龍，幾乎可以講句「實死冇生」。但只要大家熟習唔同怪獸的生活習慣同移動方式，都可以利用地形優勢打低佢，例如匿在湖中，等怪獸飲水時偷襲，不過點計都係人多好辦事，Online組隊先係王道。Online打龍又點計錢？30日/60日/90日券分別要800/1,500/2,000 Wii Point（每Wii Point等同1日圓），以90日券約需$160計算，每日任劈都唔使兩蚊，計落都幾抵玩！

類型：動作

開發：Capcom

平台：Wii

售價：約$500（普通版）

查詢：2725 3338

撰文：布偉倫

部分攝影：盧展程