02/08/2009

播放本新聞相關短片

洪卓立詩雅陳家樂拍拖多戀事

上帝製造了一男一女後,「愛情」順理成章成了人間的糖衣陷阱:相識、相戀、長相廝守固然人間美事,只要中間稍微有所偏差,往後一生或許只落得遺憾、怨懟……一人一生起碼有一個愛情故事,洪卓立、詩雅及陳家樂三位年輕偶像,這天大方談愛!

洪:洪卓立 詩:詩雅 陳:陳家樂

洪:你哋有冇好難忘嘅戀愛經歷?

詩:呢方面我有大無畏精神,愛嘅時候可以完全付出,但一感覺到唔愛,絕對可以做得好絕!我試過好鍾意一個男仔,佢對我呼呼喝喝,連我屋企人都好心痛點解我要咁折磨自己?最後我發現佢同以前個女友keep住關係,我忍唔住同佢講:「你呢次真係好錯!」

死因 唔篤檸檬茶

陳:入行前我同一個女仔拍咗三年拖,點知有年我生日佢忽然失蹤,後嚟仲直認已經識咗第二個,講到甩我嘅原因……原來佢嫌我一直冇幫佢篤過檸檬茶喎!

洪:我就比較衰,細細個學人拍拖,拍拍吓又覺得悶,忽然同女友講話要分手,點知佢接受唔到,耐唔耐就玩自殺,有次企跳搞到連我都上埋港聞版A1頭條。我曾經諗過不如同番佢一齊,但社工勸我唔好,因為如果我咁做,可能為佢帶嚟更傷更痛!

詩:嘩,咁點收科呀?

洪:最後佢又搞到入咗醫院,喺病床上忽然「叮」一聲明白唔應該咁樣虐待自己,我哋最終都做番朋友。你呢?同前男友做唔做得番朋友?

詩:我同初戀男友喺好和平氣氛吓完結咗關係,佢一直都keep住同我屋企人聯絡,甚至會打電話叫我媽咪去飲茶,依家佢畀我嘅感覺比朋友更親近,有時我都好懷疑,到我年紀再大啲,會唔會後悔當日冇好好把握佢呢?

當眾鬧基佬 扯火

陳:喂洪卓立,知唔知成日有人懷疑你嘅性取向?

洪:講真,細個嗰陣我比較怕同女仔接觸,驚畀佢哋笑,久而久之我淨係得男仔friend。升咗上中學後,有次有個女仔喺走廊度大叫:「死基佬,走開啦!」當時我好嬲,開聲鬧番對方,之後就冇人敢笑我嘞。

詩:咁讀書時有冇女仔主動認識你呀?

洪:試過附近學校有女仔為咗送禮物畀我跟我返屋企樓下,我同佢哋講唔敢收,因為怕女友呷醋。雖然佢哋話做吓朋友都得啩,不過之後就冇再搵我咯!

陳:詩雅,係咪所有女仔對結婚都特別有憧憬㗎?

詩:以前都有諗過想喺廿五、六歲結婚,依家反而覺得唔可以為愛情放棄身邊嘅人同事,我一定會以家人行先。你呢?入行之後係咪想將感情事排到最後,低調處理?

陳:黐線!係人都想有愛情滋潤吓啦,不過之前試過拍劇同女角有接觸,女友即刻打爛醋埕,後尾仲靜雞雞check我電話,既然咁唔信我,仲一齊做咩啫?我覺得好難要圈外人完全明白我哋嘅工作模式。

可忍受偷食三次

洪卓立與陳家樂兩位師兄,很愛取笑家住上水的詩雅,不但指她為「村姑」,又「篤爆」她愛在記者面前扮可憐,更笑她素顏最迷人,又打趣說會為她而大打出手,搞到詩雅臉紅紅不懂如何「還拖」。

兩位大男孩又大爆詩雅的秘密:「佢黐線㗎……」詩雅似被點中死穴,急忙制止二人說話,原來洪卓立與陳家樂所指的「黐線」,是詩雅曾提及自己可原諒男友「偷食」三次,何以能夠如此「忍得」?詩雅則不作解釋!

對擇偶條件,詩雅充滿憧憬的說:「要鍾意寵物囉,我屋企有養貓、狗、刺蝟……仲愈養愈多,我仲想收養埋朋友屋企隻巨型大狗添呀,好彩我屋企後面有塊地大到可以耕田。」

採訪:影視組 攝影:秦健輝 場地:GuGu Cafe

陳家樂及洪卓立髮型:Will@Chin.G

詩雅髮型:Zap@Chin.G

陳家樂服裝:REACT.Co

洪卓立服裝:2% 詩雅服裝:double dott

詩雅化妝:Meegan Seak