墮入愛河的人，要他為至愛付出，永遠冇Say No，Jester是典型人辦，自從第一次跟龍貓仔邂逅，腦海裏、生活裏都跟牠形影不離。為了令愛寵有個安樂窩，他不惜工本開設一家龍貓店；最近更大搞網上漫畫《牛牛歷險記》，捧愛寵做主角！
與龍貓一見鍾情
Jester跟龍貓仔的一段緣，可追溯至10多年前……
「第一次見到龍貓仔，係隔着電視螢光幕，可以用一見鍾情來形容，當時一隻龍貓嘅身價約六千蚊，自己仲讀緊書，根本買唔起；直至12年前，才有能力飼養。第一隻龍貓叫夫仔，外形肥嘟嘟，皮毛又滑嘟嘟，舉動勁搞笑，明明見佢企喺度發呆，突然之間會啪一聲撻低瞓覺，實在太得意，所以愈養愈多，高峰期試過養十幾隻。」
開店飼養更划算
開寵物店卻不賣寵物，世事果然無奇不有。Jester於8年前準備搬家，但新居難以騰出寬敞嘅空間安置龍貓仔，正在煩惱之際，給他發現油麻地某商場只須二千蚊即可租用一個舖位，單是冷氣費已回本，便開設一家龍貓店，作為心肝寶貝的安樂窩。「我開店子不是要『賣仔賣女』，而是給龍貓仔一個舒服的棲身之所，因此店子只售賣糧草和龍貓日用品。事實上，如果配種配得靚，我又唔捨得賣，配得唔靚，我拎佢出去賣，個心又唔安樂，所以索性唔賣，免得麻煩！」
借漫畫分享心得
開業以來，Jester認識了一班志同道合的龍貓友，為了跟更多人分享飼養心得，他找來任職設計師的Jasper（同樣是龍貓迷），繪畫以龍貓仔生活為主題的漫畫《牛牛歷險記》。Jester說：「繪製漫畫係想同大家分享飼養龍貓嘅知識，例如龍貓仔嘅牙齒會不停生長，惟有靠食草磨牙。此外，龍貓仔原產於美洲高原，一個毛孔有近80條毛，所以夏天一定要歎冷氣，否則好易中暑……我相信，如果將呢啲資訊只以文字擺上網，啲人未必有心機睇，利用漫畫表達，效果會好得多。」
樂天性格惹人愛
所謂性格決定命運，能在眾多龍貓仔中脫穎而出，成為漫畫主角的牛牛，當然有其特別之處啦！漫畫主筆Jasper說：「每隻龍貓都有不同性格，例如自己養的一隻，性格較懶，不適宜做漫畫主角，雖然牛牛一出生就盲了右眼，但牠性格樂天，好動好玩，最啱做主角，更希望藉着牛牛的角色，話畀大家知，連龍貓仔都可以殘而不廢，何況係人類呢！」
龍貓男飼養手記
飼養龍貓仔，除了滿足三餐一宿，亦要保持其披毛清潔，每天應以梳毛手套替牠梳理毛髮；天熱時，更要用乾洗粉替牠洗白白，而且要日日洗，唔懶得㗎！
食之推介
想龍貓仔Keep住可愛、健康，當然要食得好，以下乾糧不可少！
查詢電話：2332 3123
撰文：司徒德琳
攝影：胡淑儀
模特兒：Chamie @ Jade Image
查詢網址：www.petegg.com