暑假悠悠長，日日在家親子，你唔悶仔女都悶啦！
星級爹哋關禮傑（傑仔），每個月有三分之二時間在內地片場度過，留港僅得十天，因此特別珍惜親子時間，不時搞親子旅行團。「一家人飛到外地，將事業、學業拋諸腦後，可以沒顧慮、盡情玩，既可體驗人生，又可互相了解，這樣的親子生活才夠意思啊！」
玩得是福
為了演出喜歡的劇本，傑仔經常穿梭香港與內地，每月陪伴家人的時間可能僅得十天。不用開工的日子，傑仔都會自告奮勇，擔任「關家旅行團」的領隊，帶着一家人翱翔天際，向世界出發。
「平日中港兩邊走，馬不停蹄，已很疲倦，但全家可以一齊旅遊是一種福氣，一想到這裏，倦意就會一掃而空！」傑仔認為，全家人一起歷險、一起體驗新事物，印象特別難忘。另一方面，身處陌生地方，大家都會有點不習慣，有時需要互相照顧，感覺更加Close！旅程結束後，大家還可一邊睇相、一邊回味，親子之間唔憂冇話題！
體驗人生
傑仔育有兩位心肝寶貝女，大女Fabienne今年14歲，細女Franziska則7歲，兩個囡囡都勁錫爹哋，傑仔知道不可錯過這段親子黃金期：「女大女世界，她們將來可能各有各忙，未必有這麼多時間陪伴父母，趁現在可以和她們四圍去，當然要珍惜每個機會。」
不說不知，「關家旅行團」已走遍杜拜、泰國及台灣等地，訪問刊登之日，傑仔正身處加拿大，與屋企人共享天倫樂。除了吃喝玩樂，傑仔還打算籌辦一些「艱苦團」。「自己一直有個心願，就是幫助內地偏遠地區的小朋友興建山區學校，到時我一定會帶埋兩個囡囡，一來可培養助人心態，二來藉着貧苦生活體驗，讓她們明白到很多東西得來不易，從而學懂珍惜現在。」
愛屋及烏
經常在內地拍劇，傑仔對女兒難捨難離，甚至掛住女兒多過老婆！因此，在放假的日子，他都會全心全意奉獻屋企，例如做囡囡的柴可夫（司機）：「我每天會早點起床，送Franziska返學，之後又會接她放學，所以她的同學仔都認識我，關係仲幾Friend添，經常一齊玩麻鷹捉雞仔，他們更稱呼我做『Funny Daddy』呢！」
為了爭取親子時間，傑仔有時會帶同細女出席友人飯局。對於大女Fabienne，他會主動邀請其朋友仔回家一起BBQ。「主動認識囡囡的朋友，是關心女兒的方式之一，因為重視她的朋友，等於重視她。」
有進步已心足
傑仔曾經因為自己讀書唔叻，希望女兒可以把書讀好，於是過度催迫，後來才醒覺，大女的玩樂時間少了、讀書壓力大了，一年班就要戴眼鏡，所以同一套做法，沒有強加在細女身上。「考試不一定要攞最高分，只要成績每次有進步，不走下坡，已經心足！我經常同囡囡講，只要爹哋有能力，會盡量給你最好的，上唔上到大學都無所謂，能夠做一個明辨是非的人，更為重要！」
有準備 玩得更開心
周遊列國咁好玩，有冇執拾行李嘅衝動，以下旅遊裝備專為孩子而設，色彩繽紛，帶埋上機更開心！
撰文：梁淑敏
部分攝影：胡淑儀、盧展程
查詢電話：（a）2815 0585、（b）2629 5108