古兜溫泉在廣東出晒名，更是十大溫泉之一，不過天時暑熱三十幾度，浸溫泉恐怕會暈低。唔怕！古兜現已變身冰火世界，除了熱辣辣的溫泉，更有涼透心的水上樂園。今年全新建設的冰泉世界，取自地下50米的泉水，長期保持18度，猶如甘露，幫身體每個細胞降溫，齊齊高呼：「水裏水裏去，我愛冰泉水！」
冰泉水 涼透心
古兜溫泉旅遊度假村近年不斷擴建，今年更新建冰泉世界，把月泉灣的溫泉池改建成冰泉池，引入東方紅水庫的冰泉水，新鮮又乾淨。
我們為了試試最原始的冰泉水，來到出水口的冰泉池，跟着員工一路走，池呢？員工指着一條河，難道要我跳河？看清楚，原來河上用木柵圍了一角供遊客浸泡，河水不斷流出流入，源源不絕提供18度的泉水，落水真的超冰凍，好像「咋」一聲，剛才還大汗疊細汗的身體已迅速急凍，天氣咁熱，浸冰水簡直涼到入心呢！這裏還有大大小小不同的冰泉池，讓你浸個痛快！
浸完冰泉，當然要玩水，歡樂水世界亦是引入泉水，一直保持25度，同樣涼快，人造沙灘上更有多條刺激的水上滑梯，當中必試沖天回旋滑梯，接近垂直的U形設計，夠晒刺激，坐着水泡沖下去時，請緊握扶手，那離心力猶如直墮地獄，到最低又有衝上天堂的感覺，我敢說你一鬆手，必定飛出街！嚇得驚魂未定，又畀人拉去玩埋四彩滑梯、琵琶滑梯、浪搖滑梯……今次真的成身散晒，不過又散得好興奮喎！
農莊摘荔枝 騎蒙古馬
度假村自給自足，村內的家畜及蔬菜都是自家種植，非常新鮮，遊客更可以到農莊裏的荔枝雞場摘荔枝。荔枝場見得多，不過有雞在腳間穿插的真的幾搞笑，原來這亦是雞場，讓走地雞有更多活動空間，順便食荔枝。咦！唔知啲雞食落會唔會有荔枝味呢？
時下是荔枝當造期，園內任摘任食，鮮紅的荔枝粒粒飽滿，立即摘粒咬一啖，果然核細、厚肉又爽甜，好解渴呢！在雞飛狗走後，便來到旁邊的快活谷跑馬場玩騎馬，這裏養了十多隻蒙古馬及歐洲馬，可供遊客策騎及表演，當中更有澳門的退役馬「阿哥精神」和「名城」，其他馬匹的名字也很有趣，好像紅太陽、黃風、灰太郎及小不點等，馬場老闆特別讓我騎他的御駒黃風，平時除了他之外，沒人可以騎到黃風，咁驚？我唔想墮馬變安東尼喎！戰戰兢兢地騎上去，老闆發出命令，黃風就向前行了，咦！點解老闆唔跟住嚟？只剩下我單挑控制牠行一圈，心想：你要乖乖地，我只係坐一陣咋……幸好安全返抵終點！馬場還有細細隻的廣西矮馬，比成年人更矮，樣子笨笨的很可愛，大家可以餵牠們食草或拍照，但千萬別試圖騎上去，隨時壓死牠們呀！
古兜溫泉旅遊度假村
地址：廣東省新會古兜溫泉旅遊度假村
網頁：www.gudouhotspring.com
遨遊備忘
簽證：持有效回鄉卡毋須簽證
貨幣：HK$1約兌¥0.88
天氣：7月氣溫約26度~33度
套票：古兜溫泉2日1夜套票，附送歡樂水世界門券，$499起。
查詢：2369 1919
特派記者：羅安琪
特派攝影記者：盧展程
模特兒：Shandi