寫真大戰一觸即發，一眾靚模頻頻出招谷宣傳，聲勢一時無兩……另一邊廂，有Agent大鑼大鼓簽下一班更為嫩口的模特兒，簽約儀式仲搵來多位現役靚模做配角，排場媲美Super Star！

「各位觀眾，請大家以熱烈嘅掌聲歡迎……」舞台上的帷幕徐徐揭開，射燈下的主角居然是3隻可愛的小狗，真係估你唔到！

靚模熱席捲狗界

「家陣，阿豬阿狗都話做Model，有冇咁易先？」女仔要做Model，有樣有身材，已經掂咗八、九成，但狗仔要做Model，除咗要有一副Camera Face，仲要唔怯場、識擺Pose、聽教聽話……

近日，靚模熱潮席捲狗界，一班醒目狗正式加入模特兒公司，牠們分別贏過「Next Top Dog Model」和「寵物奧斯卡短片比賽」，早已身經百戰，習慣對住鏡頭擺甫士，究竟這班明日之星有乜出位技倆？

笑面迎人

有一張Happy Face，自然人見人愛啦！小丸子身為Dog One Life的PR狗，性格開朗，見慣陌生人，仲會主動Say Hi呢！主人Prisca表示，小丸子對鏡頭好敏感，擺甫士影相當然No Problem啦！

小丸子

品種：貴婦犬

芳齡：2歲

強項：跳Over

獎項：Next Top Dog Model冠軍

聽教聽話

聽教聽話是做狗模不可或缺的條件，主人Jenny表示，Van仔勝在見慣世面，仲好似識得聽人講嘢一樣，而且影相時唔會周圍走，唔做Model嘥晒！為了令Van仔保持Fit爆身形，Jenny會以蘿蔔、雞柳、雞蛋等天然食物餵牠，絕少吃零食！

Van仔

品種：松鼠犬

芳齡：5歲

強項：坐定定

獎項：「寵物奧斯卡短片比賽」最佳狗主角

識得交戲

「大頭Cake」之前曾在公開比賽贏過「最佳男士服裝獎」、「最佳觀眾緣獎」等殊榮，面對比賽壓力有晒經驗，主人GooGoo試過將「大頭Cake」心愛的玩具拋入籠內，牠竟然懂得自己開籠，再把玩具拿出來！結果GooGoo把這段搞笑的情節拍下來，贏得最佳影片，「大頭Cake」喺冇人教的情況下都交到戲，絕對係天才演員啦！

大頭Cake

品種：長毛芝娃娃

芳齡：3歲

強項：擺Pose

獎項：「寵物奧斯卡短片比賽」最佳影片主角

撰文：楊芷穎

部分攝影：陳富權

部分相片：由受訪者提供