暑假提早放，不少爹哋媽咪都會帶子女暢泳消暑；今個夏天，麥家琪也安排囝囝Johan學游水。「健康最重要，所以一定要囝囝養成做運動嘅習慣，如果冇強健嘅體魄，讀書幾叻都冇用！」形象一向不羈的麥家琪，居然學人講健康，一句講晒：「生咗小朋友係唔同啲嘅！」
壞女孩變好媽媽
印象中，麥家琪是性感尤物，性格反叛，我行我素，跟「賢妻良母」四個字可謂大纜都扯唔埋，但自從07年誕下兒子Johan，昔日的「壞女孩」變了另一個人，溫柔、細心等母性「返晒嚟」，生活習慣也重新洗牌，樣樣事都變得井然有序，活脫脫是個賢淑媽媽。
「一直以來，我對任何人都粗聲粗氣，但依家一對住囝囝，個心就軟晒，把聲好自然溫柔咗，好似對住初戀情人咁Sweet。此外，舊時最鍾意對住部電視機，家陣就成日匿喺BB房對住囝囝。好多人話，女人一做媽咪就會變晒，自己本來唔信，依家親身體會，正正係人辦。」
凡事要睇開一點
家琪說，現在的生活很簡單，星期一至五多數留守家中陪伴Johan，逢周末兒子就會到祖父母家中暫住。初為人母的她，曾經有段時間好緊張，尤其是見到爺爺嫲嫲的管教方法跟自己有分歧，心情會好忟憎。
「Johan出生後頭半年，我有啲產後抑鬱，整個人好緊張，好難相處，樣樣都唔准囝囝吃，所有嘢都要好乾淨，經常覺得街外啲水有陣怪味，屋企啲水先至清潔。後來老公向我『投訴』，先知自己好『難頂』，之後就嘗試放鬆。舉個例，我以前唔畀囝囝食糖，只會畀佢食提子乾或乾果類零食，覺得健康啲，但爺爺好鍾意畀糖佢，初時真係好忟，但諗深一層，呢啲都係愛錫囝囝嘅表現，所以家陣只要老爺畀得開心，囝囝又食得開心，就毋須太緊張了。」
囝囝健康排第一
講到教仔心得，家琪坦言自己仍有不少地方要學習、要改善，但她有一點特別堅持，就是要囝囝養成做運動的習慣。「囝囝將來做乜嘢職業都冇所謂，只要健健康康，我就心滿意足！依家有唔少家長只顧催谷子女讀書，忽略運動嘅重要性，以致小朋友嘅體質偏弱，話咁易就病倒，因此我要Johan由小養成做運動嘅習慣。」
家琪表示，已安排Johan學習游泳，除了因為游泳是一種最能訓練全身肌肉的運動外，亦是求生技能的一種，希望對他將來有幫助。此外，由於囝囝的爹哋是高球發燒友，家琪亦希望囝囝能培養出打Golf的興趣，一來可鍛煉身體肌肉的靈活度，二來兩父子日後可一起切磋球技，增加親子相處的機會，感情都會好啲啦！
撰文：司徒德琳
攝影：黎劍華