Lavina鍾蕙芝、「E Cup Baby」劉欣宜、Rainbow胡心諾、Monique及Tian昨日在西九龍中心舉行簽名會，低胸上陣的Lavina睇頭十足，「波大有腦」的劉欣宜在台上分享時落淚搶分（圖），輸波罅贏人氣，二人各不相讓。不過當接受訪問時知道Freeze前一晚批評靚模矮和露肉時，她們即時口徑一致向外。Lavina直言靚模平靚正︰「靚模係熱潮，平面模特兒一直都有，靚模平靚正，我唔介意性感做賣點。」

石詠莉唔認得啲靚模

劉欣宜亦力撐靚模說︰「我喊因為見到三個fans club嘅會長嚟咗，好感動。（Freeze話靚模矮？）我唔矮，有168cm。（你哋正過佢哋？）佢哋有韻味。我好少睇佢哋，佢哋跳舞OK。（佢哋都行性感，無資格話你哋？）佢哋係第一隊打正旗號賣性感嘅組合，我哋係外界標榜性感。」

放大圖片	Lavina現場獲男fans跪地送花。	Freeze前晚性感出擊，石詠莉（左）更低胸大露背。

至於前晚與椋名凜、黃泆潼及王珈晴出席酒吧騷的Freeze亦性感出擊，談到靚模橫行，石詠莉直言靚模們頂爛巿︰「依家啲模特兒好慘，畀人頂爛巿，佢哋太普通，淨係騷身材，都唔認得佢哋，畀佢哋連累埋價錢，我淨係識Angelababy。」陳樂榣亦有同感︰「依家靚變咗貶詞，等同年輕、矮同露肉模特兒。」