今個星期Cheaperman接到一個非常任務，就係前往人多車多嘅旺角，去搵一處每日只開放兩個鐘頭嘅購物勝地，Cheaperman眉精眼企，喺旺角呢個購物區，不知留下多少腳毛，任何舖頭商場佢都熟悉，但就冇一處只開兩粒鐘，今次唔通真係畀隊長難倒？

出發篇

隊長見Cheaperman咁苦惱，於是話畀佢知勝地就係喺界限街附近，個名就叫做「天光墟」，於是Cheaperman就照住貼士，凌晨四點半就去到界限街，`喺旺角球場同界限街一帶轉咗好多個圈，都唔見有人，發覺仲有啲陰風陣陣添。

Cheaperman心諗隊長今次唔通要考佢嘅膽量，正想走人之際，點知有幾部貨車出現，停低後開始落貨，同時佢身後突然出現十幾人嚟睇熱鬧，唔係膽夠大，一定畀啲人嚇親，之後貨車陸續出現，一車車貨畀人擺晒喺街，成個「墟」就出現眼前。

遊覽篇

原來天光墟太早係未開嘅，佢哋每日只由五點半開到七點半，由於時間寶貴，於是立即遊覽一下，睇吓有乜嘢好介紹，Cheaperman發現呢度賣嘅，全部都係金魚或者相關嘅嘢，至於魚嘅種類多到不得了，全部一袋袋包好，仲明碼實價添。

Cheaperman打聽到天光墟嘅小販，絕大部分係由魚場直接攞貨出嚟，畀金魚店嘅買手入貨，所以價錢全部係批發價，仲有一個發現，就係買魚時，唔少人都會帶埋電筒去照照啲魚，聽講啲魚反應愈好就證明愈生猛。

終極篇

唔經唔覺已經行到天光，入貨嘅朋友大都走晒，只剩低啲遊人，而Cheaperman發現呢度除咗有飼養魚賣之外，佢周邊嘅產品都有好多，例如魚泵、魚缸、魚網同埋魚糧，特別一提，佢呢度啲紅蟲，認真生猛，買嘅朋友一斤一斤咁買走。

另外，Cheaperman仲發現有蝦有蟹賣，唔通連海鮮都有？原來唔係，近年好多人以龍蝦仔同埋寄居蟹嚟做寵物，而呢度亦有得賣，睇真啲寄居蟹咁可愛，我哋又點捨得食佢，至於天光墟裏面仲有乜嘢精彩特色，記住Click入ontv就會更清楚了解。

Hot Click三甲
第一位：深圳式串燒店

以前諗起土瓜灣，就只會想到海心公園，現在諗起土瓜灣就會諗起各式內地傳統美食，其中一間更引入深圳式燒烤，何謂深圳式燒烤呢？據負責人講，深圳式串燒多用平民化材料，除肉食外，韭菜、茄子、青椒等都有用，食法有別於日式串燒。而為咗更惹味，喜愛用孜然粉調味，喺當地最受歡迎嘅食物，就係燒茄子，把原條茄子放喺爐火上燒烤，當燒至半熟就將佢開邊，然後加豉油、葱花、蒜蓉嚟調味，燒熟後茄子入口融化，鮮味一流，至於仲有乜嘢精彩美食？登上ontv就可以知道。

第二位：林寶堅尼開篷車

今年初至喺洛杉磯車展亮相嘅Gallardo LP560-4 Spyder，首部右軚展示車近日已運抵本港，該車以明快利落嘅線條貫通全車，配合車頭嘅巨型入風口、鑽孔通風煞車碟及車尾嘅左右四出排氣喉，顯得極具侵略性，而軟篷只需20秒便可完成開啟。Gallardo嘅六前速E-gear半自動波箱，除了換檔速度快之外，就連拖波嘅補油動作也非常暢順，以往只有車手才做得到嘅高超技術，現在只要拉動軚環後方嘅拉桿便可輕鬆完成。仲想知道多啲新車嘅資料，請Click入ontv生活台就會一清二楚。

第三位：奧地利磨刀器

俗語有云「工欲善其事，必先利其器」，做得名廚，總有一把好刀傍身，方便工作，很多人認為貴刀唔使磨，其實刀嘅平貴主要取決於構造物料，價格較高嘅刀質料較堅硬、較耐用，但並唔代表佢唔會磨蝕，反之，我哋更需要好好咁保養靚刀。今日就介紹由奧地利出品嘅磨刀器，磨刀器嘅接觸面係用Cabit所造，物料比鑽石更為堅硬，一般用喺開礦時用嘅鑽嘴，將刀子放喺交叉位嘅正中央再傾側，便可打磨出三七開嘅鋒利效果，想知道仲有乜嘢嘅磨刀器，Click入ontv生活台就會知道。

撰文：布永德