日常見怪不怪的物品，只要化腐朽為神奇，都可以變作獨門的護膚秘技。等到頸長的全球首間雪花秀Spa，Sell韓式地道「相生」的「精、氣、神」，求平衡由內至外的美容哲學，仲用埋多見於食用的白瓷樽仔，以及書寫包裝用的韓紙做排毒緊膚，不僅靠皮膚吸收護膚品，而係講雙管齊下的韓式護膚功效。

名師操刀 韓式風格

首先同大家講今次雪花秀Spa有幾巴閉。香港係全球首間的選址不在話下，豪花二千萬揀喺尖沙咀廣東道開業，佔地7,200平方呎4層樓高的設計兼有埋電梯，凸顯尊貴的氣派不特止，仲請埋幫過LV兼啱啱做完揭幕的2010年上海世博會法國館搞設計的法國名建築師Jacques Ferrier操刀，幫外牆賦上富有濃烈韓式風味的朝鮮時代廟宇上的經典花卉圖案，架勢又有排場，而且為呢條街增添多一個特色之處。

為身心注入能量後，可到休息間歎杯相生茶，有助平靜心靈，消除疲勞。	3樓劃分為VIP區域，一邊為豪華單人房，內裏設有Vichy Shower外，還有獨立桑拿室及按摩浴池，可盡享浸浴蒸氣樂。	另一邊雙人房空間寬敞，兼備大按摩浴池及桑拿室，同朋友打孖歎都得。
2樓設有多間單人房，其中一間更備有圓大按摩浴池，環境非常舒適。

漢方護膚 矜貴滋陰

相信鍾意雪花秀產品的人，都係睇中其用上漢方草藥的護膚秘方；至於Spa，只此一家的各式美容工具如外形似迷你版花樽的白瓷作淨化排毒、如玉戒指般的藥石翡翠去雜質、驟眼睇似陰陽太極的琥珀助調和臟腑，仲有用桑樹皮製造具緊緻美白功效的韓紙做面膜，以及滋陰丹及滋陰保衞丹草藥球等運用於面部及身體療程上，大量新鮮感加顯著功效，相信會令不少貪靚一族趨之若鶩！

值得一提的還有於完成療程後進行、源自著名思想家李退溪《去病延壽六字訣》的相生呼吸法，根據所選的護理療程及客人本身情況，發出六種聲響，其中之一從身體最弱位置注入能量，有助強健肝、肺、心、腎、脾及三焦，由頭到尾正中中國人追求內外美兼備的審美準則！

水生紓膚補濕護理 $1,250/90分鐘

為敏感肌膚而設的紓緩護理，利用具有強效淨化功能，可吸附雜質和異味的冰涼白瓷按摩，消毒效能與其柔和的曲線，能提高肌膚吸收力兼紓緩肌肉，再配合滲透水生精華的韓紙敷面，溫和地促進循環，修護肌膚。

Step 1：療程前先以人參籽磨沙足浴作開始，放鬆身心，提升打後療程的效果。

Step 2：緊接是名為「雪花靜」之禮。讓客人從松木（減壓）、沉香（活力）及白檀香（改善失眠）中揀選最愛的香薰，美容師會把香薰油混於乾布中，並於面部進行按摩。

Step 3：香薰配合音樂，以更多的「氣」刺激五感思路，提升免疫力、呼吸及淋巴循環。

Step 4：整個療程會以熱石暖敷腹部，促進血液循環，有助改善女士的經痛及手腳冰冷情況。

Step 5：搽一層水生精華於全臉打底後，用韓紙作面膜紙，用掃沾取水生精華塗搽在韓紙上，令面膜紙緊貼全臉，然後進行肩頸手的按摩。

Step 6：以白瓷按照肌膚紋理及穴位進行按摩，淨化及紓緩肌膚，幫助排毒。

Step 7：最後敷上水分面膜倒模，為肌膚不停注入大量水分，並為雙腳進行按摩。

Step 8：療程後美容師會與客人一起做相生呼吸，以兩指按住脾臟，腰坐直深呼吸一下後，背部隨住慢慢呼氣及作「呼」聲響之時曲起，連續做3次。

撰文：黃佩琪

攝影：胡淑儀

模特兒：Alice Pang

查詢電話：3101 9861