港人至愛的街頭小食雞蛋仔，造就了一個個創業的成功故事、一條條等吃的人龍，還有渴望圓夢的趙碩之（Wylie）。童年時因媽媽管教嚴厲，她甚少吃街頭小食，這天有緣碰上雞蛋仔達人Mike，教曉她自製香脆雞蛋仔，Wylie更決心做出足料雞蛋仔，他日創業要益街坊。
雞蛋仔達人
Mike 年齡：20+
上海街老字號萬記砧板第三代傳人，本身從事室內設計，最近開設萬記砧板的新品牌I Love Cake烘培用品專門店，並準備開設烘培班教授糕餅製作。自家鑽研零失敗雞蛋仔配方，並將食譜印製送給客人，讓大家都有機會成為雞蛋仔達人。
有得索冇得食
童年時不少人都有吃雞蛋仔，但想不到這款在家長眼中較為健康的小食，Wylie卻甚少機會食：「小學附近有雞蛋仔檔，每日放學都飄來陣陣炭香，媽咪唔畀我食零食，但又怕我扭計，於是帶我去索吓雞蛋仔香就當食咗，不過媽咪偶爾都會買畀我食。」而最令Wylie疑惑是很多小販都下很少蛋漿，令味道及賣相都差少少，她希望做一底蛋漿充足的雞蛋仔，滿足童年的心願。
材料：
a.沙律油 28克
b.清水 140克
c.淡奶 28克
d.雞蛋 2隻
e.泡打粉 7.5克
f.木薯粉 28克
g.沙糖 140克
h.低筋麵粉 140克
i.吉士粉 14克
Take 1自發功衰咗!
首次做雞蛋仔的Wylie，拿着餅模一臉茫然，惟有憑着童年記憶，學着雞蛋仔小販咁做。
1.先將低筋粉、泡打粉、吉士粉及木薯粉同篩。
2.雞蛋和糖打勻後，加入淡奶和清水打至起泡。
3.將蛋糖分幾次加入篩好的粉內拌成麵糊，最後加油撈勻。
4.注入麵糊後將餅模合上，於明火上燒每面約2至3分鐘。
Wylie之處女雞蛋仔！
Mike評：「麵糊下得太少，雞蛋仔之間沒有相連部分，取出後逐粒散出來，咬落軟身不夠脆，形態和口感都不能達到雞蛋仔應有條件。」
Take 2師傅教路 85分!
零失敗秘笈
1. 先在餅模掃一層薄油，麵糊要注八至九成滿，太少則不能做到餅粒相連。
2. 合上餅模後，要馬上反轉，並搖數下，讓麵糊均勻流到另一邊餅模。
3. 中途可打開少許餅模，留意餅的生熟程度，每面燒約2分鐘便可。
Mike貼士
1.「雞蛋仔應該外脆內軟，每粒餅仔都要相連，餅粒中間要鬆軟。所以麵糊要先擱上一小時待其發酵。其實雞蛋仔都幾易學難精，要做到面夠脆，而中間還要軟熟。」Wylie收到指示後，重新再做一底，果然似模似樣。
2.如要做其他口味，可將吉士粉改作朱古力粒、綠茶粉、草莓粉或芝麻粉等，做法一樣。
自家製必備工具
OL界早已流行自製糕餅，就連自製雞蛋仔也開始流行起來。工具十分簡單，只需模具一個即可。幫襯I Love Cake買餅模，更附送Mike自家配方的雞蛋仔食譜一份。
撰文：陳惠賢
攝影：黎劍華
髮型：People@Hair
查詢電話：2671 2671