坊間主流的PMP，不是3吋便是4吋芒，同朋友逼埋一齊睇有啲辛苦，Speed最近推出的RH1，個芒就足有5吋大，機背仲有喇叭，唔使「獨食」插耳機先有得聽。解悶之餘，可以叫埋心儀對象一齊睇片，畀足機會你埋身，仲唔係一舉兩得？

靚芒播高清

RH1像一般PMP一樣，集聽歌、睇相、播片、FM收音機、電子書、錄音等多種功能於一身，同時支援到RMVB、FLV、AVI等常用影片格式，毋須吓吓轉片咁麻煩。較突出的是此機具備一個5吋16:9比例LCD闊屏幕，解像度高達800×480，比市面一般的PMP，甚至PSP遊戲機的解像度高出許多，並且支援720p高清影片播放。試用過後，發現此機的播片質素十分理想，影像流暢清晰，而且層次感分明，播放高清影片亦沒有窒格或聲畫不同步的情況出現。

提供USB接駁電腦，也可經AV接口輸出聲畫。	試播720p高清影片，效果清晰流暢，色彩也算自然亮麗。	集合FM收音機、聽歌、播片、睇相、電子書及錄音等多種功能。

大容量啱儲片

雖然具備5吋大芒，不過RH1的尺寸也不算太大，約為128×83×14mm、重170g，平時袋落手袋也算輕便。主要按鈕設於機頂，跟機有遙控器方便操作。此機備8GB和16GB兩款容量選擇，仍嫌不夠，可使用記憶卡擴充容量。RH1支援最高16GB的microSDHC記憶卡，帶備出外使用，猶如一部隨身儲存多媒體檔案的硬碟。除此之外，此機內置喇叭，與朋友一齊睇片就最啱用。

機背備有喇叭，毋須局限要戴耳機才能聽歌。	設microSD插槽，支援最高16GB容量記憶卡。	跟機附送遙控器，揀歌、選片都很方便。

撰文：陳若冰　攝影：林資凱、譚建章　查詢電話：2958 1113