謝婷婷與安志杰打得火熱，近日報道都以「男女朋友」來稱呼二人，不過婷婷卻叫記者別寫對方是男友，因為她想感情再穩定一點才公開，不過為怕愛郎誤會，伊人急急謂︰「唔好話我唔認！」
鬼妹仔謝婷婷向來率直，前晚她為楊其龍的Misocool拉麵店擔任剪綵嘉賓時，澄清與安志杰還未是「公開」的男女朋友，她說︰「我未認過，唔好寫係男朋友，（唔方便公開？）唔係，想等關係實啲先，（依家未穩定？）唔係，不過唔好話我唔認（戀情）！（咁應該點稱呼安志杰？）可以寫英俊安志杰。」雖然不肯確認男友身份，不過婷婷卻大讚對方︰「佢好乖、好專一、好自律，（會執屋？）佢好乾淨，好健康同埋好尊重人，媽咪都讚佢好乖。」
唔想佢做打女
婷婷又透露近日為做打女作好準備，既上演藝課程又學詠春，她說︰「哥哥做戲好辛苦，之前佢學詠春有搵我嚟試打。不過我唔會搵佢（安志杰）切磋，佢做嘢太辛苦，都唔想我打，驚我會受傷，佢好錫我。」另外簽了霆鋒前助手作經理人的婷婷，否認是霆鋒在背後捧自己，並謂希望自己模、影雙線發展，對於近期G模拋胸橫行，婷婷大方謂不敢批評︰「唔知點解有咁多，身材靚嘅我都會睇，其實每間公司做法唔同，唔會影響我，不過做嘢都唔關佢哋G模事，佢哋唔會冇實力，亦唔到我批評。」
Ana R.晒32B
同場的Ana R.谷胸上陣，她笑言早前被指平胸，所以要平反︰「我一直都係32B，不過冇戴Bra就顯得瘦啲，戴個啱尺碼就睇落大啲。同埋拍拖之後我肥咗八磅，David令我好開心，佢仲好好人，唔介意我着得性感。（佢係你識嘅最好男人？）第一位要留畀細佬，佢第二啦！」
至於投資七位數字的拉麵店，楊其龍希望兩年半內回本，並有意在年底前再多開兩分店，他又笑言因為爸爸楊受成看好前景，因此要佔大份做大股東，前晚更特意抽空到場的楊受成就豎起拇指支持兒子。而來捧場的還有家姐楊諾思、叔叔楊超成及朋友韓君婷、Cara G.等。
文：名人組