（怕你唔知，以下係改編自一個著名洗頭水廣告……）
當我第一次知道要寫媽媽腸這個專題的時候，其實我是拒絕的，因為我覺得，你不能叫我寫就馬上寫，第一，我要試一下，寫完一個稿以後加了很多爆花，那條腸會「動AL」起來，仲會自讚好味、好玩、好正……結果讀者一定罵我，根本沒有這種媽媽腸！所以我說先要給我試一下，後來我知道媽媽腸真的是好味，而且真的有魚肉成分的，那……食了幾次……起碼我食了很舒服。現在呢……每天還在食呢……我還給了趙碩之、RubberBand食！來！來！來！大家試試食！寫完之後，這條媽媽腸就是我影的媽媽腸，請不要再加Clip Art上去！我要給讀者看到媽媽腸就是這樣子，你們在超市買的，也是這樣子……
撰文：鄧善文 攝影：林資凱
查詢電話： （a）2811 0478、（b）2884 6888
（c）2234 2888、（d）3148 9423
（e）3580 1808、（f）2332 2896
媽媽腸頭號Fans：趙碩之
扭扭扭扭爆媽媽腸
女神趙碩之原來是媽媽腸的擁躉，一見媽媽腸人磁石貼立刻愛上，更加知道其設計的因由：「呢個媽媽腸人中間分得開，因為食媽媽腸嘅時候通常都係在中間附近扭吓扭吓咁，將條腸扭成兩半，然後由開口位唧入口，細個時一日可以食十幾條，因為媽咪覺得呢款零食夠健康，多食唔怕。」
媽媽腸二號Fans：RubberBand
媽媽腸的兒時回憶
泥蜢：（扮正經，因為當小記是其老細陳輝虹）「當時學校小食部冇乜嘢賣，所以每日放學必食，仲一定係跟屈臣氏汽水（一種兒時飲料，跟維他汽水一樣已絕種）。」
阿正：（一向冷靜，隊長不愧為隊長）「小學時候食唔少，最愛用媽媽腸送福麵，依家學生仲有媽媽腸，但應該冇人知福麵係乜……」
藝琛：（好鬼雀躍，一見特大媽媽腸立刻想扭爆佢！）「好鍾意食，食唔停，其實味道一般，行山一定帶一大堆跟身，唔怕在山上餓親。」
6號：（理性分析……）「細個好少食，因為覺得唔天然，今日先知原來當中有魚肉成分，細個見同學仔出行力也咬唔開兩頭嗰粒鐵，拉長晒橙色個包裝，好核突……」
媽媽腸大變身
爆熱日本！勁卑賤媽媽腸人
日本仔出Character應該是出到冇嘢出，於是近年向食物入手，繼去年Bandai推出以中式點心為設計靈感的「點心熊貓」系列後，另一設計公司Framework's Lab則利用日本土炮零食媽媽腸為Character主角，更有故事背景：他是一位東京眾多打工仔其中之一，在魚蛋工廠中工作，日日畀人上司鬧都不用被炒魷的原因，是因其父母跟廠長是老朋友！媽媽腸人每日返工望收工，收工望放假，人生價值就像一條媽媽腸的價值般卑賤，可以說是「多個唔多，少個唔少」，生活態度講盡今時今日天下所有打工仔心聲，所以在日本一推出就Hit爆，其精品系列以File、Notebook等Office用品為主，極之實用，暫時只有Log On有得賣。
上得大枱媽媽腸菜
媽媽腸可能是一款已被現今小朋友遺忘的兒時小食，不過，經近日城中兩大大熱食店大廚的創意炮製，出來的絕對不是一條媽媽腸咁簡單……
Fusion菜系La Stage
La Stage一向以燒烤及日菜著名，雖然隱藏於銅鑼灣信德街，但憑口碑就吸引到不少食客，當中更有不少是明星𡃁模，大廚Gary最講求食物及醬汁的配搭，小時候食過不少媽媽腸的他卻是首次將它入饌，這次他將可愛友善的媽媽腸，變身為萬聖節恐怖小食……
大熱點心店添好運
不用再多介紹，排隊人龍塞爆廣華街口的添好運點心店，以創意點心「脆皮叉燒包」主打，日賣七百個，主理人培哥及強哥日日朝七晚十一做到手軟，百忙之中竟仲有時間研究媽媽腸菜式，試過放腸粉、包雞紮、切粒放入叉燒包後，兩位最後想出用蒸這個方式去炮製媽媽腸。
媽媽腸小歷史
媽媽腸又稱大洋腸，星爺在《他來自江湖》則叫媽媽腸做「霹靂大肉腸」，主要成分為魚肉，所以又叫魚肉腸。1935年，日本農林科學家首先發明以吞拿魚做火腿，到了1949年，「西南開發工業協同組合」首先運用這意念，製做出魚肉腸。五十年代，因氫彈試驗和領海問題，令日本漁業受到打擊，利用剩餘魚肉做魚肉腸的產量增加，最多使用的是日本產量最多的鱈魚和吞拿魚，而根據日本政府標準，魚肉成分要達百分之五十或以上才能叫魚肉腸，所以媽媽腸雖然口感極假，但真係有魚肉成分，冇花冇假。