繼舊女友吳家欣後，還未有再帶新女友示人的張震，早前被拍得與舒淇面貼面，舒淇卻爆他多辣妹埋身，不過被踢爆的張震卻不嬲反笑。日前他出席車展活動時，回贈舒淇也很辣，認真禮尚往來。
張震早前在上海被拍到與緋聞女友舒淇的面貼面照片，舒淇又指他身邊多辣妹，對於被緋聞女友踢爆，身為Audi「奧迪英傑匯大使」的張震，似乎一點都不介意，還順勢大讚舒淇好火辣，他說︰「舒淇都幾辣，不過我依家好忙，要學功夫，朋友都見唔到。」現時正積極為《一代宗師》練習功夫的他，被問到新片何時開工，他大開玩笑說︰「未知，王家衛嘅戲，劇本可能有，喺佢個腦入面。」難怪忙於練功夫的他，日前也能抽空到珠海出席Audi的新車活動，並即席試揸新車，不亦樂乎。
自己去遊車河
雖然汽車被視為是大男生的玩具，不過張震卻不愛儲「玩具」，他說︰「車對我嚟講，可以揸就得，我買車以實用為主，我唔覺得車係身份象徵，佢只係代步工具。我成日都會自己遊車河，喺台北放假嘅話，我會揸車去唔同嘅地方，周圍去睇下有咩好食，同埋去探婆婆。有時喺日本、美國都會自己揸車。車係我私人空間，喺入面傾偈都唔同啲，我好鍾意喺車廂內聽歌，有時仲會泊埋一邊睇書。」
唔會酒後駕駛
對於不時被狗仔隊追訪，張震自言會先考慮其他道路使用者的安全，他說︰「可以點？就算畀人跟我都會照揸，不過要照顧其他駕駛者，要注意安全，我亦唔驚畀狗仔隊跟，大家都係做嘢，只係私人生活唔想畀人知道，唔想畀人侵犯。所以好多時有人影，我都唔會理，佢哋都知我無咩事。而且我一定唔會酒後揸車，太危險。」
文：名人組
攝影︰林楠
服裝︰Dior Homme
髮型︰George Wong
化妝︰Candy Law