這個世界有太多人喜歡攞尾彩，我們簡稱這一類人做尾彩樺。這個名字純粹食字爆笑，沒有太多其他特別意思。
身邊其實有好幾個尾彩樺朋友，通常他們的特質是唔多留心人家講說話，但是又要扮留心，人家在說着甚麼？尾彩樺根本就懵然不知，不過會扮聽，最頂唔順的是永遠，記住是永遠，尾彩樺都會為任何人打完場！萬試萬靈！唔信？你試吓就知！真的煩到個人爆開……
而尾彩樺幫人打完場通常得一個伎倆，就是重複番人家剛剛講完的那一句說話！然後再喺前面加埋呢兩個字：「係囉！」
尾彩樺打完場例句一：「係囉……好睇好睇！呢套戲真係好好睇㗎！」不過，大家要知道，尾彩樺係未睇呢套咁好睇的戲㗎！不過要答嗲同攞尾彩！
尾彩樺打完場例句二：「係囉係囉……都唔知點解會咁？」咩呀？你梗係唔知點解會咁啦，都唔關你事，你又唔知頭唔知路，答咩嗲啫？
其實，一班朋友入面總有一兩個尾彩樺，煩就真係煩咗些少，不過……算啦！尾彩樺都只是在最尾令你覺得煩，總好過有些朋友全程都令你覺得煩！
時裝設計師