畢業出嚟咁多年仍然一事無成，理想無望又窮到燶，點算好？計我話只要閂機再開，造多個新人物出嚟就得！講緊其實係明日面世嘅模擬人生遊戲「The Sims 3」，生活上有乜唔如意、有乜唔敢做嘅事，都一一可以在遊戲內達成，咁有冇可能在遊戲中邂逅到女神劉心悠？有可能㗎，原來劉心悠一直都係「The Sims」忠實擁躉，早過晒你同我開始玩「The Sims 3」，仲話今集好玩程度爆晒燈，得10分滿分！
追求完美
「The Sims」遊戲設定都幾女性向，好多女性玩家都肯花時間同精神去打工賺錢買傢俬，得閒時又同老友開Party，估唔到連劉心悠都畀呢款遊戲吸引住，由第一集玩到依家第三集，每集新出都會煲足幾個月。「只係玩過今集兩次，發覺畫面靚咗，顏色又Rich咗，同埋有六十幾種性格組合配搭，可玩性提高咗好多！」心悠用甚麼標準去創造角色，又有甚麼目標？「我會將角色性格設計得好似我，但係又可以做到平時做唔到嘅事，例如我好想去曬太陽但又唔得閒，遊戲入面就可以換上一身古銅色皮膚。玩遊戲時次次都盡力將所有數值玩到最高，因為我本身係一個追求完美嘅人。」
性格多元化更逼真
講番「The Sims 3」，心悠都已經講咗唔少新功能同賣點，但實情當然唔只咁少。其中最花精神亦最好玩嘅就係創造人物，今集將各設定選項做得更精細以及設有更多選擇，網上已見到有「The Sims 3」短片出現天籟村姑Susan Boyle、美國總統奧巴馬等角色，有心機嘅話，根據自己或女神心悠嘅肖像創造新角色都得，不過有網友彈冇得輸入三圍數字喎。正如心悠之前所講，性格設計得相當仔細，玩家要從64種性格中揀選5項，從而組合出角色嘅性格，要搵到兩個性格一模一樣嘅角色同真實世界一樣唔容易。以前話「The Sims」遊戲入面好似冇乜目標，Hea吓Hea吓就一日，今集就特別加入長期目標同不時出現的短期目標，做到嘅話又會加分，挑戰性又大咗。另外，今集嘅NPC唔再係紙板人，佢哋會好似遊戲角色一樣成長同變老，夠晒逼真。
人鬼情未了
如果打機完完全全好似現實生活其實幾冇癮，所以小記鍾意「The Sims 3」嘅「邪惡玩法」。上一集已經有整死其他角色嘅「玩法」，好似其他角色遇到火災或浸親都唔出手相救，甚至阻住佢求救，今集更將「死法」增加到5種，不過難度就相應提高。而如果角色死後設有墓碑，玩家間唔中會見到鬼魂周圍飄，甚至乎同鬼魂談戀愛都得，十足十《人鬼情未了》！雖然冇刻意宣揚，遊戲中其實可以傳宗接代，不過場面就求其過廿年前港產片，用張被笠住就算數；而沖涼或去洗手間都有超大格仔遮住。大家玩「The Sims 3」記住買正版，因為正版玩家可以上網免費下載一張新地圖，又可以同其他玩家交換道具、分享遊戲相片同影片，好玩好多！
遊戲資料
類型：模擬
開發：Electronic Arts
平台：PC
推出日期：6月2日
售價：$300（普通版）、$380（特別版）
查詢電話：3166 6001
撰文：布偉倫 部分攝影：張群生