當電視機不時響起《香港小姐》主題曲時，又接近一年一度的港姐選舉了。陳倩揚（Skye）、馬賽（Sire）、高海寧（Samantha），這三位S字頭的港姐經一年時間的洗禮後，變得更溫婉、成熟，從當初的戰戰兢兢參選，到現在落落大方做主持，期間經歷了許多。面對即將卸任，三女誓言會出盡100%力量，在娛圈綻放更耀眼光采！
一年彈指過
○八年，還是在台下學習儀態、談吐的小妮子，○九年，已是在台上展示「美貌與智慧並重」的師姐。在三位港姐眼中，一年時間在彈指間不經意的走過了，Skye說：「當見到○九年港姐招募，我先驚覺『咁就一年嗱？』真係眨眼就過咗！」Sire笑說：「記得一年前都有猶豫，慶幸最後下定決心參選。呢一年我進步咗好多，無論係EQ、扮靚或者談吐方面都係。能夠將興趣變成工作，真係好開心！」Samantha則說：「參選後接觸到好多人，變得世故咗，好榮幸可以成為新一屆港姐嘅師姐。」
盡數難忘事
一年間，從受訓、正式參選、作親善訪問、代表香港出賽、到嘗試幕前工作，究竟哪一樣最難忘？儘管口裏嚷着「好難揀喎，樣樣都咁難忘！」三人最後還是「勉為其難」的選了一二事。
Skye津津有味地說：「記得港姐比賽嗰陣要吊住威吔跳彈床同打後空翻，我未試過咁刺激嘅玩意，依家諗番起都仲歷歷在目！（參選世界小姐難忘嗎？）比賽喺南非舉行，嗰一個月我哋成班女仔都住喺森林入面啲茅屋度，同大自然玩遊戲（笑）！我仲克服咗對昆蟲嘅恐懼，因為基本上每朝起身都會發現成屋成床都係蟲，再驚嘅對足佢哋一個月都變咗唔驚啦！」
Samantha亦認為參選過程最難忘：「開頭以為參選港姐只係會學識儀態同擺甫士，但其實心智成長係最多！」問到是否因為要應付參選初期傳出的負面新聞而令EQ高了？她淡淡的說：「可能係啦，當初壓力係有，但後來諗番其實得多過失！」至於熱愛演藝工作的Sire則指首次擔任校園liveshow主持的經驗也很難忘，出場前前輩提供的意見更令她終身受用。
冠軍失影蹤
同屆冠軍張舒雅去年尾因身體問題「半退隱」港姐界，一切港姐活動就落在三人身上。身為亞軍的Skye代其出征「世界小姐」、「國際中華小姐」及日本親善訪問，而參選「國際小姐」這任務則由季軍的Sire頂上。雖然名銜上沒改變，但三S早已在履行冠亞季的職責，加上其時更成為張舒雅的「代言人」，問到三人可有感到擔子加重？不愧為港姐，三人表現落落大方，Skye和Sire不約而同表示：「港姐係一個大家庭，冇話fix死邊個一定要做邊樣嘢嘅，一個團體發生問題大家齊心協力去解決，係理所當然嘅事。額外工作會當係bonus多過係壓力，反而會珍惜！」身為旅遊大使的Samantha則說：「港姐形象健康好重要，最緊要做好自己，人哋嘅事唔方便評論。」
勇闖主持路
參選港姐無疑是進身娛圈的完美踏腳石，三位即將卸任的港姐都被看重，擔任新節目的主持。早在選美時展現伶牙俐齒一面的Skye是革新版《東張西望》的主持之一，她笑說：「《東張西望》係我喺TVB第一份正式工作，好開心有多一個渠道畀人認識！（做主持最難係乜？）我覺得最重要係學識執生，同埋同周圍嘅人培養默契！」
Sire則主持飲食節目《咁至識食》，並表示會好好抓緊機會：「我同Suki（徐淑敏）同Kathy（周汶錡）一齊主持，好好玩！我認為做主持係其他演藝工作嘅基礎，可以訓練到對鏡頭嘅敏感度。」而Samantha將擔任時尚節目主持，形式有如中文版的《Dolce Vita》一般，能接觸到新的潮流資訊令她相當興奮！三人都承諾會好好做主持，繼續在娛圈大放異彩！
3S的感情生活
三位港姐中就只有Skye在拍拖，其餘兩位感情都一片空白，難道不愁寂寞嗎？且看看她們怎麼說！
Skye：我同男友感情目前好穩定，感情生活可以講係perfect！結婚？我都幾傳統㗎，當然希望同佢有完美結局，不過目前都係以工作為重！
Sire：入行之後接觸異性嘅機會少咗，大多數時間都係同其他港姐一齊出席活動，不過我信緣分嘅！
Samantha：我覺得自己對拍拖嘅心態唔同咗，以前可能會想調劑生活，但依家主攻工作，感情事都冇諗太多！
採訪：專案組 攝影：秦健輝
服裝：LEONARD Paris 場地：太子大廈