名店大冧價貴材平食

經濟麻麻，眼見周圍都大減價，就連名店食肆都玩冧價，幅度之大前所未見，令食客非常驚喜！好似亮明居半價即享特選六道菜晚餐，四人同行仲贈送美酒；天婦羅專門店稻菊則推出假日半自助餐，任食即製野菜天婦羅；而酒店中菜廳《粵》，更加係唔使$200食勻鮑參翅，點都值得大家趁機平食一次！

撰文：楊淑英　攝影：盧展程、郭凱敏（部分）　模特兒：Dolphin（Color Zone）

香煎安格斯牛柳配黑虎掌菌汁：牛柳鮮嫩無渣，是粉絲的必食之選，加上大量什菌烹煮，健康又惹味。	亮明居特色拼盤：包括香醉鵝肝、燈影牛肉及麻辣松花雞：四方鵝肝帶點紅桑子汁，酸香油潤；牛肉薄脆香辣，依足傳統炮製；松花雞捲着四川皮蛋及廣東皮蛋，增添幾分鹹香。	珍菌黃燜南非鮑：鮑魚以足料上湯，及由四川空運到港的新鮮野菌如松茸、牛蒡菌等燜熟，鮑魚食落煙韌鮮甜，更有種菇菌幽香！
餐廳菜式中西合璧，跟店內時尚裝修甚匹配；最愛其180度靚海景，身心都得到滿足。

亮明居半價歎靚景晚餐

有180度維港靚景的亮明居，集合四川及西菜風格的美饌，加上有米芝蓮推介，說是名牌食府絕不為過。餐廳由即日至六月底推出四款特價套餐，當中以特選六道招牌菜晚餐最抵，由原價每位$800勁減至每位$400，即係半價有得食！聽講平日晚飯人均消費至少要$550，呢次減價真係超值。

而晚餐菜式全部係招牌作，包括前菜的香醉鵝肝及燈影牛肉、珍菌黃燜南非鮑及香煎安格斯牛柳配黑虎掌菌汁等，分量、用料都沒有將貨就價。此外，四人同行惠顧晚市更可免費享用Deakin Estate, Cabernet Shiraz, Australia 2007紅酒，美酒佳餚再配以維港夜色，氣氛一流。

特選六道菜晚餐（原價每位$800、優惠價每位$400，另加一服務費）

亮明居特色拼盤（香醉鵝肝、燈影牛肉 、麻辣松花雞）

傳統酸辣湯

珍菌黃燜南非鮑

古法乾燒智利白鱸魚

香煎安格斯牛柳配黑虎掌菌汁

金絲蜜棗伴紅梅軟餅配青檸雪葩

查詢：2393 3933

活蝦及季節魚天婦羅：活蝦天婦羅是從蝦缸即撈即製，鮮味四溢，是餐廳的招牌菜，而季節魚則是沙追魚及真鰹魚，同樣香脆Juicy。	稻菊特選刺身沙律：集合三文魚、深海池魚、甜蝦及帆立貝等，非常鮮甜，沙律菜亦很新鮮，食時有爽脆聲響。	自選野菜天婦羅：多達15款選擇，包括南瓜、番薯、粟米芯、舞茸、茄子及大葉等，全部即點即製，而且可盡情食，令人興奮。
餐廳環境布置糅合了江戶時代及現代日本美學的元素，感覺優雅舒適。

稻菊任食野菜天婦羅

以天婦羅聞名的百年老店稻菊，名人食客不絕兼經常爆場。位於四季酒店的分店推出全新「假日天婦羅半自助午餐」，每人可享用一客稻菊特選刺身沙律、炸雜菜餅蕎麥麵或飯、活蝦及季節魚天婦羅，以及自家製甜品，單看陣容已很豐富，但原來還有多達15種野菜天婦羅可以任點任食，包括南瓜、番薯、粟米芯、舞茸、茄子及大葉等。

所有野菜將放在自助餐桌上任意挑選，再交由師傅即席炮製。日籍天婦羅大師淺野基一郎會先將野菜蘸上特製的天婦羅炸漿，然後以優質芝麻油香炸，加上油溫控制恰到好處，件件出品都新鮮兼甘香鬆脆。據知平日散點一客雜錦野菜天婦羅（約8~9件）便要$120，如今只需$380即可盡情食，輕易就回本了。

假日天婦羅半自助午餐

供應期：即日起至六月底，逢星期六、日及公眾假期（父親節除外），11:30am~2:30pm

收費：每位$380（另加一服務費）

查詢：2805 0600

「粵」四寶鮑汁（海參、鮑魚、鵝掌及北菇）：雖然不是用上矜貴貨色，但簡師傅絕不欺場，鮑魚、海參全部按傳統方法扣煮，再燴上鮑魚汁芡，非常入味。	砂窩紅燒菜膽翅：足兩両的魚翅非常軟滑，吃得出的紅燒味道，用砂窩盛載，的骰精緻。	五穀炒香苗伴燒汁靈芝菇：將粟米、芋頭、菜粒、崧子等，跟高粱米及絲苗炒香，質感豐富，而燒汁靈芝菇亦是爽甜無比。
這中菜廳的布置較為時尚，而且地方寬敞，品嘗鮑參翅大餐最好不過。

粵食齊鮑參翅唔使$200

減價潮真係一浪接一浪，食埋鮑參翅又如何？城市花園酒店中菜廳「粵」推出的珍饈百味宴，食齊砂窩紅燒菜膽翅、「粵」四寶鮑汁（海參、鮑魚、鵝掌及北菇），以及五穀炒香苗拌燒汁靈芝菇，原價每位要$398，依家半價優惠每位$198（另加一服務費），非常震撼！雖然套餐平通街，但有經驗豐富的餐廳行政總廚簡捷明師傅主理，可謂質素保證。

查詢：2806 4918