黎耀祥與鄧萃雯都是公認的好戲之人，但多年來都與重要的獎項擦身而過，二人對此早已看通看透，正如「柴九」的名言：「人生有幾多個十年，最緊要活得痛快！」就算不是「視帝」或「視后」，一樣可活得痛快、活得精彩。
入行24年的祥仔，終於擔正做《巾幗梟雄》的男主角，「柴九」更為他擦靚「主角」招牌，劇集叫好又叫座，觀眾自然揣測年底「視帝」非祥仔莫屬。而去年夏雨、米雪成視帝、視后，打破「親生仔至有獎攞」之定律，祥仔可有盼望？他一貫淡定地說：「都係冇，我成日都話頒獎禮係宣傳活動，唔使認真，獎項嘅嘢有好多客觀因素，不過如果有獎當然開心，就好似中六合彩咁，中咗開心，唔中都唔會唔開心。」
唔會爭做主角
「綠葉王」做「主角」反應好，但祥仔明白自己只是演員不是明星，不介意下一部劇可能要做回二、三線：「我好明白公司唔係善堂，我冇可能永遠做主角，一部兩部唔得就做番二、三線囉，公司照出糧㗎，唔使咁辛苦但騷錢一樣喎。」從低做起的祥仔比較實在，不會有任何憧憬，不過他仍禁不住說：「我知自己唔好運唔會一炮而紅，觀眾係多年嚟累積嘅，講真，後生都有恨過攞獎嘅。但做咗廿幾年仲爭做主角，會好辛苦㗎，我早就睇通。」
「人生有幾多個十年，最緊要活得痛快！」哪祥仔現在痛快嗎？他說：「絕對係！從影以來最好玩就係『柴九』呢個角色，外間又有好反應，對我嚟講，係寫下最精彩嘅一頁！」
主動出席飯局
另一邊廂，鄧萃雯當年在《金枝慾孽》演「如妃」一角，以為眾望所歸會成為視后，結果因「非親生」而只得「實力非凡獎」，問她有否替自己不值？雯女淡然地說：「冇覺得唔抵，我冇期望好耐啦，一來唔係咁恨，而且有冇獎、有冇提名都係咁做啦。呢幾年我啲fans失望過，我都會視為動力，唔想令佢哋失望。」
不少人都將得獎成數與高層飯局出席率掛鈎，多年來雯女都是飯局稀客，但早前卻出席副行政主席梁乃鵬的飯局，雯女笑言：「主動咗喇！其實都係志在參與，我性格唔係咁主動嘅人，我只會努力做好角色。拉票爭獎唔係我性格，有觀眾支持已經冧晒！」
從信仰得領悟
雯女坦言信仰教曉她，心思放在那裏，財寶就在那裏。而她的心思不在獎項，所以沒她份是正常，她又說：「其實我咁早出道，要乖、要聽話，我早就做過，如果我依家仲原地踏步，就冇進步啦！每件事都有得有失，得唔使開心，失唔使傷心。」
陳法拉跑得有層次前輩激讚
在新一代小生中，黎耀祥睇好吳卓羲、黃宗澤及林峯：「吳卓羲天分唔差，要繼續努力；黃宗澤嘅性格有特別嘅氣質，鍾意諗嘢，會諗唔同嘅演戲方法。林峯有親切感，亦即係觀眾緣，有啲人靚仔未必有親切感㗎，佢就係嗰啲由媽咪級到少女都鍾意嘅一種。」
至於花旦多籮籮，雯女睇中的都各有特色：「陳法拉喺《家好月圓》做啞女有場跑步戲，演得好好，唔好以為跑步戲好易，佢真係一路跑一路演，有戲喺裏面，好認真，仲有層次，令我印象難忘。楊怡都好好，演戲時好易觸動感情；徐子珊就好聰明，睇到佢係用心去演。」
髮型：Ivan Lee@Headquarters（黎耀祥）
Michael Lam@TONI&GUY（鄧萃雯）
攝影：謝國華（黎耀祥）
沈健程（鄧萃雯）
服裝：Calvin Klein（鄧萃雯）
文：影視組