可宜激讚美國菜Change出新派頭

美國總統奧巴馬一句Change，轉出世界新氣象，原來美國飲食界幾年前已在Change，比總統還走快幾步，帶來了新派美國菜：以國際化食材入饌，味道清新、賣相精緻，剛於蘇豪開業的UNION J也走這路線，令有線娛樂新聞台主播可宜（Natalie）亦邊食邊讚好。

撰文：楊淑英　攝影：盧展程

煎黑鱈魚．芳香椰子沙律．野米 $208：黑鱈魚以攝氏65度慢煮，肉質滑溜，面層更鋪上椰子絲、青蘋果、葱及薑絲等，味道豐富，伴菜換上煙韌野米，更為健康。	70%暖心朱古力蛋糕．開心果雪糕 $88：蛋糕像極梳乎厘，食落柔軟，而旁邊的開心果雪糕更撒上雲呢拿鹽，鹹鹹地幾新奇，亦能提升朱古力的香濃美味。	雖然未試過鹹味的雪糕，但食落又幾夾喎！朱古力蛋糕味道好Rich！
餐廳放有幾塊大黑板，畫上了時令推介，喜歡的話可照着點菜，感覺得意。

食材按時令選擇

問起對美國菜的印象，Natalie即時答：「每碟菜都好大份，又煎又炸咁，同埋食物選擇以水牛雞翼、漢堡包、薯條及熱狗等為主！」無錯，傳統美國菜也許如此，但今時今日原來已經轉變晒喇！事關當地飲食界近年悄悄起革命。

餐廳其中一位「煮」腦──行政總廚Eric Johnson解畫：「美國屬多元民族的國家，每個民族的飲食文化既獨特又互相影響。近年好多大城市，就將東西岸及其他國家的食材結合，再互相配搭烹調，成為新派美國菜。」而揀選於香港開業，是因為這裏有不同國家的食材，方便炮製菜式，他會經常到中環街市購買新鮮蔬果及海鮮，只因新派美國菜也很着重時令，令菜式味道更鮮美。

雜莓乳酪雪糕$48：造型取材自唐人街的外賣中餐，內藏自製的雜莓乳酪雪糕，入口即融，酸酸甜甜的好醒胃。Chef Jason笑言可讓人客外賣，邊走邊食。	咁得意嘅外賣盒，個個見到都鍾意，何況裏面有雜莓乳酪雪糕，好透心涼呀！	烤雞胸．巴馬芝士多士．羅勒汁．蘆筍 $198：雞胸鋪上鹹香芝士，嫩滑又香脆，澆上鮮綠的羅勒汁，賣相變得更清新；以磨菇及蘆筍等作配菜，可中和肉類的油膩感。
牛肉他他．車厘子橄欖醬 $158：牛肉他他用上蛋黃醬、海鹽、辣椒汁、檸檬汁、羅勒等作調味，還有車厘子橄欖醬及慢煮的熟蛋黃鋪面，將所有材料拌好塗在芝士麵包上品嘗，感受食材在口中融化的滋味。

菜式變小巧清淡

另一「煮」腦──行政餅廚Jason Casey補充：「新派美國菜唔再只得傳統的漢堡包、薯條及熱狗，選擇會比以前更多。而為配合健康食潮，食物的分量小巧，賣相精緻兼少鹽少油，更以新鮮香草調味，令味道更為清新，有時更會以慢煮方式烹調，不再一味的Fast Food。建議品嘗時配襯白酒，會凸顯到新派菜的風格，唔會覺得Heavy。」為保持食物質素，兼且跟隨季節時令，餐廳的食物選擇不多，頭盤、主菜、甜品平均每類只得六、七種，並會每兩星期轉款。

聽完大廚們解說，Natalie都覺得新派美國菜吸引：「雖然我對食無咩要求，可以日日食漢堡包都得，但其實唔多健康。新派美國菜健康清淡，有菜又有肉，營養均衡得多。加上菜式賣相精緻咗，完全唔覺得係美國菜，吸引力即時大增，好似70%暖心朱古力蛋糕配開心果雪糕咁，就同餐廳塊黑板上畫得好似，仲標明材料分量，好得意呀！」

UNION J大廚檔案

餐廳由兩位「J」字大廚——Eric Johnson及Jason Casey掌舵，前者負責頭盤主菜，後者鑽研甜品，分工合作，但迸發出來的美味火花，卻是非常厲害。

行政總廚 Eric Johnson

曾跟多名世界級名廚如Daniel Boulud及Joachim Splichal等學藝，之後加盟紐約Jean Georges旗艦餐廳，鑽研法式料理的技巧，數年後更在Jean Georges於巴黎開設的Market餐廳擔任行政總廚。由於廚藝精湛，Chef Eric其後被派往上海外灘的Jean Georges餐廳，出任總廚兼合夥人一職。他擅長炮製當造海鮮，還愛選用新鮮野生香草及香料作調味。

行政餅廚 Jason Casey

自發現對甜點製作有濃厚興趣及天分後，他便向一代甜點宗師Otto Bernet及到法國有名的糕餅學校Ecole Lenotre學藝，廚藝因而更上層樓。搬到紐約後，Chef Jason曾於Restaurant Daniel、DB Bistro，以及在榮獲米芝蓮3星的Jean Georges餐廳及其Cafe Nougatine工作，2004年更被派往上海外灘的Jean Georges 餐廳出任甜點總廚。

可宜小檔案

中英混血兒，於香港土生土長，並曾到英國留學，08年經有線主播大募集而入行，現為有線娛樂新聞台主播。自言性格活躍，鍾意講嘢，所以喜歡出外採訪，並從中學到執生技巧。

查詢電話：2537 2368