星期日是母親節的大日子，當然是為人子女送禮表孝心的好時機，不過每年例牌請食飯、送名貴禮物的話，咁就太無誠意。要媽咪開心其實好簡單，不妨學Cheaperman新作風，親自挑選最合適母親的禮物，讓媽媽於母親節過得更多姿多彩。
撰文：余家洋
提起母親節禮品，Cheaperman知道地球人必定要送康乃馨，事關5月是康乃馨飄香的日子，康乃馨代表子女對媽媽說「我愛你」，表達對母愛的感激之情。但向來搞作多多嘅Cheaperman就認為要搞搞新意思，於是第一站就去到全港最集中嘅旺角太子花墟，希望揀到另一種花送母親。勢估唔到，Cheaperman走勻花墟，最後竟然送一盆羅漢松喎！點解，咁就要登入on.cc解吓喇！
溫暖體貼．精打細算
單單送一盆鮮花又點夠呀？所以Cheaperman第二站就準備為Cheap媽添新裝，近近哋就走到潮人集中地太子某商場，發現全商場都係女人，睇佢哋年紀，相信仲要係母親添！Cheaperman更用「走向地球潮流尖端靚女」形容佢哋，冧到呢班母親笑到見牙唔見眼，抵錫！當然，Cheaperman梗係買到心水靚衫冧Cheap媽啦！
窩心禮物．親手製作
買完靚衫，相信都夠皮冧媽媽，但Cheaperman話誓要將Cheap媽變「潮媽」，要潮，當然要至潮首飾配襯啦，Cheaperman決定要親自打造一條天下無雙嘅頸鏈，等Cheap媽威吓喎！咁講法，唔去深水埗汝州街飾物集中地又點得呀！嗰度整條街都係賣飾物，七彩繽紛，睇到花多眼亂，Cheaperman仲話嗰度超多靚女，結果企咗成個鐘都無法集中挑選心水首飾，最後要勞煩靚女售貨員幫佢度身訂造一條，盛惠$25，真失敗！鮮花、新衫、首飾樣樣齊，計計數，Cheaperman呢個冧媽成本都係$84，呢個Cheap媽真抵冧！
作為子女在長大，媽媽不斷變老。對母愛的回報，豈只限送禮呢？要做一個全職孝子，絕對要顧及母親的健康，讓偉大的母親一直年輕下去。
第一位 流感剋星 護眼口罩
雖然H1N1甲型流感暫時受控，但大家都要注意個人衞生及做足預防措施，尤其母親節大日子，少不免會出外食飯慶祝，傳統口罩只係基本裝備，因為據傳染病科醫生權威勞永樂所指，流感除口、鼻傳染，雙眼亦係其中一個途徑，今次勞醫生就喺ontv生活台，親自教大家如何Diy一個又型又實用嘅護眼口罩，仲唔快啲Click去學自製一個送畀媽咪！
第二位 家用好幫手 穿針器
母親年紀大，眼力差都好正常，唔想因為媽咪穿針時整傷手，Cheaperman有好推介，於大埔廣場某地舖，專售各式日用品，如毛巾、線剪、指甲鉗，品種多價錢平，三件只售$12，特別推介呢個穿針器，倒轉針頭一放，再放條線，按個製，就會自動穿線，唔信，自己上網𥄫𥄫啦！
第三位 滿心滿足 法國美食節
五月除了是母親節，更是法國美食節，最啱帶媽咪去擦餐勁，Cheaperman搵勻港九，最啱佢心水就係呢度，為慶祝法國美食節，精挑細選特色法國美食，有頭盤、主菜及甜品，仲有葡萄酒介紹，一邊歎紅酒、一邊食精緻晚餐，給母親過一過難忘母親節，夠窩心！