廖碧兒（Bernice）成為首位進軍荷里活的無綫花旦，入行七年，終於獲派首份英文劇本，令Bernice百感交集，感動又興奮。對現時圈內新人「性感」氾濫，一向形象性感又健康的她有弦外之音，笑說：「性感健康係有得揀嘅！」
事業篇
首次接拍荷里活電影做打女，Bernice形容過程非常愉快，難得在Vancouver拍電影，在當地長大的她猶如重遊故鄉，她說：「我住嘅酒店同嫲嫲屋企好近，我一得閒就走去黐住佢，夜晚仲同佢一齊孖鋪添！」今次在片中的角色要講英語對白，對「鬼妹仔」Bernice來說更加如虎添翼：「超開心，終於冇語言障礙啦，之前我拍劇睇中文劇本好辛苦，你知我中文有幾『好』㗎啦！今次用番英文做戲真係好開心，開心到唔識形容。」
飯盒度身訂造
在溫哥華拍戲，Bernice感覺與香港的拍攝手法截然不同：「拍攝手法、休息時間同膳食安排都有很大分別，香港人乜都要快，一個布景拍廿分鐘就搞掂換景，外國人就慢工出細貨，譬如一個公路景可以拍一日，事事要求perfect！但香港嗰種齊心快手、團結一致換景嘅場面真係好震撼。」
外國的製作隊伍非常體貼artist，Bernice說：「外國人好着重休息，最長嘅拍戲時間係十八個鐘，周末畀我哋休息。喺香港，我試過連續開工卅七個鐘，幾犀利！Vancouver嘅crew『放飯』好重視artist個人喜好，會為我哋『度身訂造』買飯盒。香港多數淨係一人一個叉燒飯，咁當然我都好掛住香港嘅叉燒飯！」不用拍戲時，Bernice喜歡四處走，陪嫲嫲去唐人街飲茶，探親戚朋友，他們當她舊街坊般招待，她還愛上閒時織頸巾及冷衫消磨時間，認真懂享受！
愛情篇
說到浪漫縹緲的愛情觀時，Bernice自認重視家庭，十分喜愛小孩，入行前她對自己說廿九歲前要生BB，結果入行後將target（目標）改為卅五歲，但仍希望可以生七個。剛踏入三字頭的Bernice，距離目標還有一大段時間，但是「三年抱四、六年抱八」未必是不可能的，努力！
擇偶兩大條件
擇偶條件呢？她充滿憧憬的說：「一，要有夢想；二，對我百分百支持，特別係事業上嘅支持，我係一個artist，希望佢可以體諒我工作唔定時。」看似對愛情保守的Bernice原來不抗拒閃電結婚：「最重要係有溝通同溝通到，即使拍拖拍得耐都唔代表啲咩，幾多年感情都可以話分手就分手。」看看近年娛圈的例子，就知Bernice所言非虛。
靚模篇
近一兩年「模圈」靚模湧現，一眾少女紛紛以青春性感打扮博青睞。形象健康性感的Bernice一向深受廣告商歡迎，要性感得來不俗氣又健康，並不容易。
勿結交壞朋友
她說：「我覺得年紀細就唔應該刻意賣弄性感，性感有得揀嘅，應該因應場合同需要，唔使下下都用性感取勝！同埋整體形象好緊要，好似我唔去夜場、唔飲酒、唔結交壞朋友。」
入行以來Bernice都未被拍到過「夜蒲」，可見是全心全意保持健康性感形象。她更多謝經理人公司為她細心篩選工作，令她形象正氣，互相信任。
採訪：鄧倚淇
攝影：沈健程
髮型：Warden Luk@IL Colpo
化妝：Ivan Lee 服裝：BCBG