【吳靜嫻北京直擊】台灣人氣偶像賀軍翔早前與蔡卓妍（阿Sa）合作拍接吻戲，被女方大讚是Good Kisser，前晚賀軍翔出席活動時，承認對阿Sa有過電感覺；不過，最想合作女藝人首選夢中情人周慧敏，並為對方抱不平。
前晚時裝品牌I.T假北京三里屯Village橙色大廳舉行時裝騷及派對，慶祝b+ab及http://www.izzue.com北京旗艦店開幕，出席嘉賓包括謝婷婷、賀軍翔、黃偉文、田原和莫小奇等，場面熱鬧。
承認咀阿Sa過電
台灣偶像賀軍翔剛在北京完成電影的拍攝工作，早前他與阿Sa合作拍接吻戲，被女方大讚是Good Kisser，對此，他表示拍戲要認真投入，做男生要主動一些，並笑言希望給每位女藝人留有美好回憶，他說：「拍戲當然有少少真嘅嘢，冇好感就做唔到對手，我都有少少過電嘅感覺。（對阿Sa有？）都會有，每個合作嘅女生都有。」不過，他強調當導演喊Cut後就會從角色抽離，而他對每個對手的感覺都不一樣。
問到最想跟哪個女藝人合作時，他首選周慧敏，並自爆：「佢係我嘅夢中情人。（佢結咗婚？）冇關係，如果佢願意嘅話。」至於早前倪震啜爆張茆一事，他表示有留意報道，又為夢中情人抱不平：「我為佢抱不平，男生要對一個女性認真、專一，尤其係漂亮嘅女生，唔應該令佢傷心。」
婷婷吊安志杰癮
同場謝婷婷單拖到場，無懼寒冷天氣以跌膊迷你裙上陣，對於日前與安志杰以情侶檔行騷時，對方輕搭其屁股一事，婷婷解畫說：「係搭住腰，如果係摸Pat Pat，應該係喺下面兜上去。（佢有冇試過咁做？）冇，當日我哋第一次合作，合照時用手搭住帶領大家一致望向鏡頭。」婷婷表示依家兩人關係OK，平日會互相致電約對方，她解釋：「朋友我得五個，佢真係我嘅Best Friend！」當被問到安志杰對記者承認想她做其女友時，婷婷即一臉尷尬：「唔知呢！（隔空向你示愛？）多謝！我比較慢熱，保持依家呢種關係都OK。」
文：名人組