打開大門，薯片被咬到一地都係，鬧鐘更跌至「粉身碎骨」……邊個咁搗蛋？原來搞事者叫Monkey，係范萱蔚（Percy）嘅愛貓，雖然唔係來自馬騮山，但非常頑皮，每次「行兇」都出於好奇心，做錯事永遠走為上着，不過仍氹得主人笑瞇瞇。一眾「百厭星」係時候學嘢喇！
幾分鐘的矜持
只有9個月大的Monkey，是一頭摺耳貓，擁有一身閃亮的黑毛。Percy表示，Monkey是從父親朋友處領養回家，是人生中第一隻寵物。其實小記之前對Monkey的百厭事略有所聞，初見面卻發現這頭「百厭星」黐到主人實一實，一臉少女的矜持惹人憐愛。殊不知不到幾分鐘，Monkey便開始露出真面目，不停狂喵其他貓咪，擺出一副撩是鬥非的模樣。
既百厭又抵錫
「呢啲已經係小兒科，佢喺屋企簡直百厭100倍，令你哭笑不得！」雖然Monkey做盡蠱惑事，但只反映牠有點小聰明。「其實Monkey好抵錫，唔會亂抓家具，只會喺貓玩具上練爪，而且一入門已懂得上貓廁所，慳番唔少打理工夫。」Monkey好像聽得懂Percy的讚美，繼續其搗蛋行徑，看來貓咪都識得恃寵而驕呢！
Monkey's扮嘢事件簿
1.扮無知
貓如其名，Monkey出名百厭冇時停，而且非常為食，無論瞓到幾冧，一聞到食物香味，就會即時彈起身！消夜更加係Monkey至愛，不時趁主人熟睡時四出偷食，更咬到零食包一個個窿，猶如被老鼠咬破一樣，當被人責罵，就會周圍望、扮無知，好似想將責任推到老鼠身上。
2.扮Cool
除了好似馬騮精一樣活躍，Monkey亦可以好似狗仔一樣，做出Sit、接波等動作，仲會走到門口迎接Percy回家呢！「Monkey會在我回家時一支箭咁跑到門口，每次一開門，牠不是在門口舔毛，就是站到門口旁的麻柱練爪，一副若無其事的模樣，明明好開心，又要扮Cool，你話係咪蠱惑先！」
3.扮飛人
睡房一直是Monkey的禁地，每次Percy站在門外指着牠說「唔准入」，Monkey都會坐定定扮乖，然後趁Percy一轉身，即扮飛人竄入房。其實此舉都係為博紅顏一笑，每朝Monkey都會跳上床用「貓掌功」替Percy按摩，叫她起床，難怪深得Percy歡心！
4.扮隱形
閒時，Monkey最鍾意攀着枱腳、櫈腳企到直一直，如打拳一樣，非常搞笑，試過因此整爛音響器材，犯案後不消幾秒已立即利用全身「黑瞇掹」的優勢匿入暗角扮隱形，係咪高招呢！
摺耳貓源於蘇格蘭
摺耳貓的故事最早可追溯至1951年，一頭貓咪在蘇格蘭庫泊安格斯某個牧場裏誕下了一頭塌耳小貓，「蘇格蘭摺耳貓」之名由此而來。摺耳貓擁有圓圓的臉和眼，耳朵如帽子一樣蓋於頭部兩側，樣子討人喜愛。牠們的個性溫馴，跟狗狗也能和諧共處！
撰文：楊芷穎
攝影：陳富權
部分相片：由受訪者提供
場地提供：阿貓地攤