從天災中走難為題嘅「絕体絕命都市」系列，在遊戲界中可謂自成一格。雖然轉到PSP上推出嘅第三集，用番第一集地震條橋，但災難危機感就營造得更有氣氛，而且最搞鬼係其中一個女角竟然YUI上身，走難時仲有閒情彈結他減低玩家嘅壓力，呢條橋真係絕！
撰文：布偉倫
防壓力大爆血管
首先要交代吓減低壓力有咩用處，玩家所操控嘅角色會有「體力」同「壓力」兩條能量Bar，當即將遇到危險時就會「壓力」狂升，爆錶嘅話就會減體力，體力用完就Game Over。走難過程中既要搵出路，仲要不斷自我減壓，餘震時踎低、坐低抖吓同聽吓女角唱歌都會有效。雖然負責「幕後代唱」嘅飯田舞未到YUI級數，但係為咗呢隻遊戲都特登作咗主題曲同插曲，而且幾好聽，至於有冇真正治愈作用就等大家自己感受嘞。
對答左右性格
相比以往兩集，遊戲算設計得幾有心思，開始時可以揀選以男主角或女主角進行冒險，在過程中嘅對答仲會影響主角嘅性格，唔同性格取向對體力損耗同復原效果都有唔同影響，如果日文了得的話就記住答得小心啲。最後不得不提係今次為咗PSP版本而加入嘅合作走佬模式，要互相幫助逃離災場，不過講真，四人合作走佬點都唔及四人互劈好玩，係叫有啲新鮮感囉！
類 型：冒險
開 發：IREM
平 台：PSP
推出日期：4月23日
售 價：$318
查詢電話：2725 3338