「教父」（The Godfather）遊戲有經典電影做後盾，個個角色有血有肉；新推出的二部曲「教父2」（The Godfather Ⅱ）更唔係單靠武力，仲新加入策略遊戲玩法，在邁亞密這塊新肥豬肉上調兵遣將爭地盤，識得「攻城掠地」之餘仲要計好條數分派適量手下駐守，避免畀敵方幫會反噬一口，做大佬要好打又要有腦，世界真係唔易撈！
撰文：布偉倫
溫故知新帶你入戲
第一集遊戲已是06年出品，唔太記得故事同操控實屬人之常情，所以「教父2」專登設計序章等大家重溫故事同熟習操控。遊戲雖然係繼承自第一集，不過玩家所控制的角色已「面目全非」，可以因應自己心水執一下眼耳口鼻；角色造型都好Elegant，個個着晒西裝褸、恤衫同西褲，這亦是「教父」的魅力所在。序章講玩家要帶領Vito Corleone在古巴走佬，基本上只要走佬途中搵Cover再伺機開槍打低幾個差人就可完成任務，然後正式在美國邁亞密打江山搶地盤。玩法方面仍好有自由度，總之唔理手法有幾污糟，只要搶到地盤就得。
教父視點一眼關七
今集加入新設計的「The Don's View」即「教父視點」，一眼可以睇晒成個城市眾多「賺錢源頭」的分布同油水有幾高，各位大佬同時要睇吓當前形勢，如自己有幾多手下同敵方幫會有幾多人在該場所把守，再判斷應該用甚麼方法進攻，譬如搵人先搞破壞，賄賂有關官員抑或全體總動員開戰等，打贏搶了地盤就自然可以得到更多油水招兵買馬。之前不少「GTA」類遊戲都係一個人打晒，但做得大佬出出入入冇人傍住實在太唔似樣，所以「教父2」可以畀玩家帶同3個手下一齊行動，例如派個識玩火或識爆破的手下去敵方的據點搞破壞，然後自己就開槍掃低敵方的嘍囉，玩落都幾爽，而且策略同動作兩方面都做得幾平衡，考腦筋亦考反應。
連線模式有排煲
「教父2」加入新連線模式，有趣的地方係可以將單人模式所收到的手下放在Online戰場上同其他玩家火拚，大家可以因應唔同手下的特性同能力派佢上場。想在Online上拎得優勢，單人模式中當然就要好好教班手下。連線方面有幾個基本模式畀大家玩，好似炸據點、生死戰等，在連線模式中表現出色的話，仲有機會得到獨門升級秘方，能將武器升級成獨有品種，然後放回單人模式上使用。這招確實夠晒聰明，單人同Online模式都逼你煲完再煲，令大家唔會玩幾玩就嗌悶。
遊戲資料
類型：動作
開發：Electronic Arts
平台：Xbox 360、PS3、PC
推出日期：4月7日
售價：$299（Xbox 360）$380（PS3）$280（PC）
查詢電話：3166 6001