絲絲講場：亞馬遜機械人展大比併
早前舉行嘅亞馬遜年度機械人大會，當初只係老闆貝索斯自己搞嘅私人party，家陣大會就分開私人和公眾兩個部分。今年大會貝索斯雖然無帶佢隻私家機械狗巡場，但亦有現身會場，參觀一吓各款機械人展品。
會場所見，各式各樣嘅機械人琳瑯滿目，除咗工業物流機械人、機械臂、無人送貨車外，生活化嘅商業機械人比比皆是，而各參展商目的其實只有一個，就係博取貝索斯嘅垂青，隨時可帶嚟億元生意。
Ambidextrous Robotics係一雙由人手操控嘅機械手臂，已經可以層層疊紙杯，現正向拎起薄薄嘅紙張進發。密芝根大學研發嘅機械腿比坊間產品先進得多，用家穿上這條機械腿可健步如飛，快慢由人。
優必選（Ubtech Robots）首款服務業雲端智能機械人Cruzr已開始投產，化身餐廳侍應嘅佢，初階段暫時只可幫客人點餐。
英特爾發展智能鏡子，除咗可以提供日常電子生活訊息外，更有鑑貌辨色功能，發覺你心情不好，仲可叫專屬語音助手Alexa播番首啱聽嘅音樂俾你聽，等你無咁愁。
余絲韻