Market Insight：股市旺場 券商股受惠

不過，在氣氛高漲下，仍有幾點要多加留意。首先，騰訊（00700）在昨日大升市中逆市跌1%，表現有別其他權重股。咁究竟係大戶沽騰訊買其他股，定係醒目錢見大市升得差不多決定先食一食胡，就要拭目以待。

憧憬中美貿談有佳音

其次，恒指昨日上破250天牛熊分界線28,351點，為去年六月以來首次。同時，單計藍籌股，就已經有29隻上破250天線，市底轉強已是不容否認的事實。當然，近期大市愈升，牛熊重貨區就繼續傾斜落熊仔一邊，咁今轉升市係咪單純因為要挾淡倉而引致，似乎又並唔係咁簡單。

最後，以往美匯指數偏強，港股通常都較弱，但年初至今港股一路升上嚟，美匯亦唔見大跌。當然，外圍避險因素及外幣匯率升跌對美匯亦有影響，但睇怕今轉美匯同港股逆向相關系數似有下降趨勢。

策略上，無論市場炒大幅放水又好，炒中美貿易談判有轉機又好，港股牛市定熊市都好，總知跟住個勢炒就實無錯。騰訊既然要抖抖氣，不妨轉吼近日曾經推介過愈戰愈勇的港交所、受惠「水到渠成」的內銀股，以及受A股氣氛回暖刺激的中資券商股。

先睇內銀股，都係揀番大大隻的建行（00939）及工商銀行（01398），兩股市帳率皆約0.8倍左右，息率分別達5.1厘及6厘，估值具吸引力。如果A股真係因為有水到而進一步抽上，相信吼實上述兩隻內銀股都無雞走。

走勢上，建行在一月初6.3元拾級而上，近期在7.1元遇阻回落，不妨小注候低吸納，短期有機會試衝250天線約7.2元，止蝕6.8元。

內銀龍頭應仲有水位

至於工行，股價同樣自年初開始於5.5元水平反覆向上，二月初高見6.1元後整固，短期若守穩20天線5.8元，有機會更進一步，首個阻力位6.2元，跌穿20天線止蝕。

至於中資券商股，又係食住A股個勢。中國銀河（06881）、HTSC（華泰證券）（06886）、中信證券（06030）、海通證券（06837）及中金公司（03908）的升幅介乎2至5.4%，更帶動埋本地券商股第一上海（00227）及國泰君安國際（01788）等。

大行高盛發表報告指，中資券商將迎來新業務機遇，估計中資券商今年收入可提升1至7%，並上調大部分中資券商股目標價。既然板塊氣氛隨大市改善，資金料持續流入A股，且有大行睇好，短線值得揀隻心水券商股走一轉。

古勝