唔好理人家放閃，絲絲話畀你知，獨自快樂不知對經濟幾咁有貢獻。國金證券剛剛就出咗一份《單身經濟崛起，消費新勢力抬頭》報告。
報告指，中國未來會似日本，主動選擇單身嘅人愈來愈多，當中85後至95後（24至34歲），最願意使錢亦敢使，未來大消費行業嘅投資機會，就要睇佢哋嘅使錢邏輯。
呢群單身族有少少宅、鍾意打機、愛旅行、偏愛「小確喪」式（即是少少頹與空虛，算係「小確幸」嘅相反）嘅表達方式。
佢哋嘅消費有幾個特色，第一係花錢買方便。佢哋主要幫襯便利店同叫外賣，亦由於居住環境細，多功能嘅懶人小家電市場非常有前景，但前提係件家電要好樣。
第二係花錢買「靚」。佢哋好着重「顏值」，唔少人使用面膜頻率係平均每周一至兩次，每年平均網購3.3支唇膏，仲未計其他護膚品、精油等。
第三係花錢買靈魂。旅遊係重要消費；咖啡室亦唔係為飲咖啡，而係一種消遣同社交，睇戲亦一樣。
第四係花錢買寄託。佢哋養寵物嘅佔比逾七成，毛孩對於佢哋，直頭係親人；講到打機，遊戲行業將向社交化方向發展，電競係主流，而漫畫、動漫等視訊會係單身經濟嘅重要增長引擎。
余絲韻