Market Insight：博反彈切忌太貪

近期投資市場有幾點值得留意，首先，港股由早前的裂口上升，逐步轉為即市發力，其中早市動力又比午市強。其次，即使指數級級上，但部分股份開始跟唔上，好似昨日華潤置地（01109）及中國移動（00941）分別跌1.9%及0.2%，至於騰訊（00700）及滙豐控股（00005）兩隻巨無霸僅升0.3%及0.07%，反映港股由兩萬五樓下彈到現水平，資金再追貨意欲明顯下降。

資金漸傾斜牛證

最後係市場雖押注美國年內加息速度減慢，但美元兌人民幣落到去6.76水平開始唔肯落，若短期美元唔再跌，即早前中資股受惠市場重估人民幣的熱潮或已告一段落，未來中資股要再上就要另覓催化劑。

此外，港股去到現水平，無論買定沽贏面只得一半半，再睇埋恒指牛熊證街貨分布，資金以押注落牛仔為主，貨量亦都唔算少，用相反理論，後市進一步爆上的機會似唔大。

權重股無乜指標性，反而有兩個板塊有好轉迹象，當中包括近排古勝多番建議唔好沾手的醫藥股，以及受惠數據消息的內房股。

先講醫藥股，今轉炒上主因是有大行出報告唱好，仲話行業被嚴重低估，所以見龍頭中國生物製藥（01177）及石藥集團（01093）股價分別升7.1%及5.3%，而麗珠醫藥（01513）及綠葉製藥（02186）分別升5.5%及5.9%。

策略上，熊市博反彈當然要揀龍頭，所以見昨日資金主力押注落兩隻藍籌藥股上。兩股往績市盈率分別為24倍及27倍，同過往吓吓講到40倍樓上，家陣叫做平易近人咗。不過，由於上面蟹貨重重，反彈難以一次到位，故建議小注候低吸納，相信中線更有錢途。

內房趁勢炒一轉

至於內房股，受惠於剛公布的去年十二月70個大中城市樓價數據按年升9.7%，更為連續39月錄得上升，消息刺激中國海外（00688）升0.3%，中國恒大（03333）漲1.7%，融創中國（01918）升2.3%，碧桂園（02007）抽高3.4%，雅居樂（03383）升3.4%。

從基本面分析，即使內地要穩定經濟增長，但亦唔可能全面放鬆對樓市的調控。不過，如果單計人行持續放水及人民幣回穩呢兩個因素，早前累跌不少的內房股借勢炒一轉亦唔過分，但炒還炒，最緊要識食胡同肯止蝕。

古勝