絲絲講場：今年證券界花紅難有驚喜

沈大師：同過往差不多

雖然去年港股大跌，但訊匯證券行政總裁沈振盈（沈大師）就話整體無受影響，證券行大都可以照Keep到Profit！佢解釋，好似佢哋公司唔係主要靠佣金，上市IPO都做得多，同埋都有利息方面嘅收入，所以花紅同過往差唔多啦！

至於騰祺基金管理投資管理董事沈慶洪就話，暫時未有數字，但估計花紅都唔會話特別多。而信誠證券聯席董事張智威亦承認港股舊年表現麻麻地，但佢公司嘅花紅就仲未知會唔會因而下跌。

志昇證券研究部董事麥嘉嘉話，一般證券行按年比較嘅話，應該有下跌少少。

麥嘉嘉：額外Bonus唔多

佢又話，雖然未有實質數字，但自己公司就唔算跌好多，花紅都應該係三個月糧左右。但比起一七年就應該冇咁多額外Bonus喇！

絲絲打聽咗十幾間券商，基本上都答仲未知，但估計花紅金額相當於兩個月糧咁上下。

香港投資學會主席譚紹興指，一八年整體無一七年咁好，全行花紅應維持兩至三個月糧。

窩輪及牛熊證發行商方面，大多數輪商都唔肯透露行情。而瑞士投行瑞萬通博香港上市產品銷售部主管翁世權（Simon）話，○八海嘯後，愈嚟愈多投行為花紅附加約束性條款，若違反條件公司有權收回花紅，如員工未來一年離職等，以減少員工流失，或杜絕某啲員工拎公司錢去炒作冒險，贏就分花紅，輸就公司輸。佢仲話，近年自己都冇對花紅有好大嘅期望。

余絲韻