孖妹S檔案：「債券天王」富斯 唔驚衰退信號

中美貿易戰：即使落幕 困局仍難解

Kitty：美國總統特朗普上星期講，喺符合國家安全利益或有助中國達成貿易協議嘅情況下，自己會介入司法部針對華為高層案件嘅調查。但都係聽住先，關稅一日未除，一日都有變卦。

彩兒：不如請教「債券天王」喇。

富斯：我十分希望中美貿易戰會盡快結束。我非常清楚今次嘅對峙背後隱含着更深遠嘅問題，因中國強勢崛起，部分美國人會覺得受威脅。一日有人咁諗，就算貿易戰完結，呢個問題都會繼續纏擾中美兩國。

攬炒不如見好就收

彩兒：傳聞美國政府擔心華為通過其通訊產品獲得美國國家安全情報，所以大家先會將華為事件同貿戰混為一談。

富斯：查實中美兩國喺管治方式上一直以嚟都有好大差異，所以需要中美兩國互相了解政治體制嘅不同，然後雙雙作出調整，最後能成為朋友，就最理想不過。但我明白知易行難。我真心想見到中美關係好轉，若我幫到手，希望用盡綿力去達成此願景。

Kitty：你有一顆好善良嘅心。我對其他國籍嘅人嘅愛護，只限於去海外義教。

富斯：好好喇。只係我哋方式唔同。一九年我最大願望係世界和平，世界變得美好！What I hope for, pray for and act for, is peace！

彩兒：相信國家元首除咗擅於運用政治手腕，亦富有智慧，明白設貿易壁壘等同攬炒，不如見好就收。

富斯：無錯，貿易戰只會兩敗俱傷，好彩唔係動刀動槍，否則後果不堪設想。

債息呈異常：短暫浮現 無關經濟差

彩兒：部分債息倒掛（Inverted Yield Curve）指短期債券收益率比長期債券收益率高。係咪響起經濟快步入衰退嘅警號？

富斯：債息倒掛跟環球經濟會唔會步入衰退無關，況且是次債息倒掛僅出現喺尾端，及維持咗短時間。若兩者同時出現，都係咁啱得咁橋。反而，要密切留意目前地緣政治風險及聯儲局非常緩慢嘅緊縮政策，或打亂環球資金流，導致經濟衰退。

中性利率難以估計

彩兒：目前美國聯邦基金利率接近中性利率嗎？（中性利率指聯邦基金利率恰到好處，唔需要再鬆或再緊嘅貨幣政策，已可達到充分就業及經濟持續增長等。）

富斯：真係唔知目前聯邦基金利率離中性利率有幾遠或近，因為中性利率無既定標準。我估聯儲局主席鮑威爾預測嘅中性利率會介乎2.5至2.75%。當然其他人有其他諗法啦。

彩兒：嘩！今個星期四香港凌晨時分聯儲局會公布議息結果，唔知特朗普最近嘅連環轟炸，叫聯儲局唔好加息，會唔會迫使主席放鴿呢？

富斯：目前聯邦基金利率為2至2.25%水平，預計聯儲局今周將宣布加多一次息，一九年加多三次，二○年再加一次。每次都係加0.25%。但料喺一九年加咗一次後，可能會稍為停一停，等美國經濟再強番啲，確保無咩金融危機再出手。

Kitty：停一停好呀！美股已見轉勢，我驚加息步伐太快，美股會直插，到時港股死梗。

彩兒：聽到唔少大行話加息周期近尾聲，但天有不測之風雲，一早叫你有胡就食咗先，無股一身輕。

亂局累經濟：貿戰打落去恐致滯脹

富斯：一八年環球政經局勢係前所未見！面對外圍不明朗因素，我已調低咗美國嚟緊一年嘅國民生產總值，亦縮減咗預期加息次數。國民生產總值由數個月前預測嘅3%，調低至1.9%。

Kitty：貿易戰殺埋身，聽到愈嚟愈多中港美企裁員，唔少香港廠商嗌晒救命。以你所知，美企有無受影響？

富斯：當然有啦。美國通用汽車（GM）受美國加徵進口鋼鐵關稅影響，令部分北美廠房生產滯銷導致虧蝕，其十一月宣布重組，關閉廠房，以削減成本，將更多資源投放喺自動駕駛及電動汽車上。而受害者點會只得GM，福特汽車（Ford）都同樣面對困境。

彩兒：有大行估計，福特裁員規模或高達2.5萬人，比通用汽車更狠。

富斯：不過，目前美國整體經濟仍幾好，近乎全民就業。但如果貿易戰繼續打落去，唔單止汽車業洗牌，全國經濟定必受損，更可能出現滯脹，即係經濟放緩但通脹加劇。

彩兒：我記得美國六、七十年代出現滯脹，當時失業率大升，七十年代初，消費者價格指數上漲11%。有外國星級股評人解釋美國通脹將升溫，係連聯儲局都控制唔到嘅事。第一，特朗普推強硬移民政策，令勞動力減少，推升薪金；第二，州政府提高最低工資，令平均工資提高；第三，美國全國都唔夠貨車司機，令運輸成本增加，企業將成本轉嫁消費者，令貨品價格上升；第四，中美兩國元首會面本身傾得好地地，突然爆出華為風波，所以中美貿易戰傾唔傾得埋欄仍存疑。

買債有秘訣：手續費貴 投資忌短線

彩兒：聽聞你無再管理Loomis Sayles Investment Grade Bond Fund，而該基金亦再無持股票或外幣計價證券，點解嘅？你退休喇？

富斯：我未打算退休，仲管理緊其他基金。上述基金改變投資策略，純粹係該基金客戶較保守，故減持股票或外幣計價證券，增持投資級別債券及美元計價外債。但好多其他基金，如Loomis Sayles Bond Fund及Loomis Sayles Strategic Income Fund仲有列明持股票或外幣計價證券嘅指引。

Kitty：最近個別低評級債券有唔錯回報，會唔會引發全球債市危機？

富斯：無一定關連！但低評級債券有高息，係可以伴隨全球債市危機，或者係債市出現危機嘅原因之一。提一提，評級指標會有滯後，評級機構往往喺全球債市崩盤時，甚至從谷底反彈先將有關資產降級。

Kitty：可唔可以贈我哋買債券嘅入門秘笈？

富斯：可以。謹記，投資債券切忌短線，因投資債券嘅手續費貴過投資股票。另要知清楚投資本金係咪閒錢，定係將來會有特別用途。我畀所有人嘅意見都一樣，買入嘅債券基金係用長線投資策略，且揀年期較短嘅好啲。

美消費意欲：零售暢旺 不代表樂觀

Kitty：若出現全球經濟滯脹，即違反物價飆升、人工加嘅常態，大家會唔會無Mood Shopping？

富斯：未見美國人減少購物，相信零售業未進入寒冬，聖誕節零售銷量仍理想，唔少門市會一如既往賣斷貨。不過咁唔代表情況樂觀。

彩兒：美國全球汽車經銷商協會（NADA）料，一九年汽車銷量會由今年1,700萬輛，跌至1,680萬輛。分析指，情況跟美國加息、借貸利率上升有關，因買車負擔大咗，所以少人買。

富斯：投資明顯少咗。我知部分上市公司為令股民Happy，選擇回購股票，而唔係再投資，令業務增長。另外，好多生意人原本睇好亞洲經濟增長會快過已發展國家，故想買亞洲股票，但見到中美貿易戰打得咁犀利，政經局勢唔明朗，都唔敢輕舉妄動。

我預計，若中美貿易戰完結，美企會加大喺中國嘅投資。過去幾年我有去亞洲，親身感受到亞洲經濟發展神速，亦有不斷尋找投資機會。

Kitty、彩兒