Market Insight：資金避險 領展防守強

今個星期好大可能係年尾比較波動的一周，事關有聯儲局議息以及中央經濟工作會議發布的政策消息，皆對短線市況構成重大影響，大家真係要打醒精神！

回看上周五港股受累內地經濟數據遜預期，滬綜指失守2,600點，恒指則跌429點報26,094點，再次失守10天及20天線，全周計數恒指累升31點，國指則累跌10點。

醫藥股低處未算低

睇番板塊方面，強股唔見愈強，反而弱股就真係愈弱，尤其是醫藥股今轉就真係弱過藥煲。石藥集團（01093）創近年半低位，跌12%報11.54元，為表現最差藍籌，中國生物製藥（01177）亦跌4.7%。

睇番今轉板塊下跌主因內地藥品改革，帶量採購中標價大降所致。又係衰喺國策手上，如果大家記得早前教育股被國策所累後的表現，應該知道今轉可以做的只得一樣──就係「撇」。

其實睇番近期多隻醫藥股下跌時成交普遍增加，遠的唔講，就睇番石藥上周五大跌，成交達13.2億元，似乎部分大戶忍唔住要沽貨。策略上，所謂跌市莫估底，板塊受政策所累股價級級落，加上成交配合顯示沽壓唔細，隨時跌完可以再跌。就算睇好醫藥行業長遠前景，暫時都係眼看手勿動。

另外，古勝早前提及短期唔好掂手機設備股，繼續跌跌不休。上周五瑞聲科技（02018）及舜宇光學（02382）分別再跌4.8%及4.9%。舜宇往績市盈率仍高達21倍，而瑞聲雖已跌到落9倍，但蘋果公司手機出貨量預期一降再降下，估值縱再低，恐怕亦未能引起投資者興趣。

咁大家可能會問，仲有乜嘢板塊可炒？講真，好快就放聖誕假兼除夕，大戶準備收爐，留在市場上的散戶資金佔大市比例可能上升，但有條件熱炒的板塊唔多，絕對係搵食艱難。

收息股吸引力再現

正因為咁，資金短期陸續流入防守股作避險之用的需求日增。除一眾公用股在年尾會有支持外，最近又公布出售資產的領展房產基金（00823）都值得望望。事關領展今年仍跑贏大市外，美國加息周期接近尾聲，領展息率又多番啲引力。

此外，近期眾多大行出報告唱好其前景，摩根士丹利認為領展出售資產對股價有利，並改善資產淨值1.5%，維持領展「與大市同步」評級，目標價78元；花旗重申對其「買入」評級及目標價82.7元。同時，領展套現後有充足的資金進行收購，具有攻守兼備特質，故可作為年尾收爐前最後一博之選。

古勝