Market Insight：內需食品股撈唔過

雖然早兩日齊齊撐起大市的國際金融股、中資金融股及本地地產股，上升動力見減弱，但除騰訊外，就連早前股價級級落的手機設備股氣氛都見改善，「手機孖寶」舜宇光學（02382）及瑞聲科技（02018）股價分別升2.5%及2.9%，成功佔據藍籌升幅榜頭兩位。

手機孖寶睇位跟炒

唔通美國科技股真係跌完？定係蘋果公司有好消息？其實統統都唔係，股價做好只因兩個字──氣氛。經歷早前急跌後，舜宇及瑞聲近日走勢皆有喘穩的迹象。現價往績市盈率分別約22倍及10倍，雖然唔算好平，但短線跟大市彈一彈都唔出奇，值得放入觀察名單。如果本周仍然愈升愈有，不妨順勢上車，目標價可先睇50天線分別約79.4元及66元，穿近期低位68元及49元則止蝕。

雖然話就話成交唔算太配合，不過除大價股外，近期部分新股表現都唔錯。其中「有食力」的新股就更加跌唔落，好似在內地做線上旅遊平台，兼與主要股東騰訊關係緊密的同程藝龍（00780），上市第二日股價先低後高，最終升1.7%收報12.62元，拋離招股價9.8元愈來愈遠。睇落集團上市時機唔錯，加上定價唔算進取，畀到啲水位入市，有機會跟住「大佬」搵食。

另外，能夠整個板塊逆市上升的實在唔多見，反之食品股昨日跌得幾驚嚇，事關康師傅控股（00322）第三季業績出爐後，被大行齊聲唱淡，股價最終大瀉17.7%。就算集團績後表明會改變策略，明年將重心從盈利擴張轉為爭奪市場份額，但就唔單止救唔到股價，仲累埋同業統一企業（00220）跌埋一份，下挫12.5%，真係累街坊。

短線入市細注為上

老實講，投資者睇完康師傅份業績，又真係好難唔沽，事關集團第三季收入佔比最高的飲品類銷售額按年跌6.5%，佔比第二高的即食麵銷售僅升0.66%，兩者都比上半年失色。加上早前市場炒低端消費時，佢又炒唔起，再考慮到未來要加強推廣及投入更多銷售費用去搶市佔率，行業競爭加劇及市場策略效果成疑，都為集團以至行業經營環境帶來不明朗因素，短中期都係唔好多手！

考慮到港股近日成交唔大，加上暫時睇今轉升市好靠騰訊領軍，萬一再度轉弱，大市一樣可以跌得好甘，所以在G20期間中美元首會面有結果前，都係細細注短炒為上，最重要策略要靈活變通，有乜風吹草動就埋單計數走人，千祈咪磨爛席。

古勝