絲絲講場：邪門密碼暗藏股災玄機？

之不過，呢場大龍鳳政治色彩明顯，金融市場係被玩死嗰隻，好難估結果會唔會搞到又股災。

但若撇開政治，股市傳有唔少「密碼」暗藏玄機，好似話滬綜指乘10就等於恒指，信不信由你。但其中話股災暗藏咗嗰「三成」密碼，就寧舍邪門，話每次股災後，恒指加三成，就係下次股災嘅低位，近年嘅股災都應驗咗……係真唔係呀？

兩次冧市都係「三成」

太年代久遠連絲絲都未出世嗰啲就無謂講，先重溫近年幾場恒指跌逾五成嘅股災。

先睇九八年亞洲金融風暴，恒指由九七年八月高位嘅16,820點，跌到九八年八月中嘅6,544點低位，足足瀉咗61%。

之後一輪大熊市，可以話係○○至○三年嗰期科網泡沫爆破到沙士，恒指由○○年三月高位18,397點跌到落○三年四月嘅8,331點低位，冧足54%。

計落，九八年金融風暴恒指6,544點低位加27%，咪即係跟住○三年沙士嘅8,331點低位！27%即差不多三成，脗合個股災密碼喎！

又再睇○七至○八年嗰次。○七年九月有風吹話港股直通車快開通，股市亢奮到不得了，恒指十月底上到31,958點高位。點知十一月初中央宣布煞停直通車，港股應聲插，加埋美國次按危機，○八年雷曼兄弟破產，金融海嘯正式殺到，恒指同年十月底跌到得番10,676點，由○七年高位計，冇咗66%！

再計吓，恒指喺呢輪金融海嘯10,676點低位，計落係上次沙士低位8,331點加28%左右，又係大概三成，個密碼又中！

咁計落去，若以○八年金融海嘯低位10,676點加三成計，咁下場股災，恒指咪會見萬三點？！以恒指昨收市26,331點計，咪會跌五成？！傳說嘅嘢嚇唔到絲絲嘅，但點解硬係覺寒寒哋……

余絲韻