Market Insight：炒消息多數短癮 提防中伏

講開又講，「侵侵」反口覆舌眾人皆知，佢喺推特的貼文「信佢一成雙目失明」。最慘係美國似不再順風順水，科技股調整壓力增同中期選舉就唔多講，淨係睇美國正式對伊朗實施制裁，油價未來急速抽升機會唔細。

內房股維持逢高減磅

同時，美國經濟數據保持亮麗，失業率又唔差的前提下，聯儲局年內及明年初仍有水位加息。再睇埋澳紐元等傳統高息貨幣都係得嗰1.5厘及1.75厘息，相對美國已經失「息」不少，咁資金會唔會仍持續流入美元資產？定係考慮到政策風險因素而減慢流入速度？凡此種種皆令後市更趨不明朗。

至於中國呢邊，昨日公布的十月份財新中國服務業採購經理指數（PMI）按月下跌2.3個百分點至50.8，為去年九月以來最低。要明白服務業PMI通常比製造業敏感度更高，暗示內地經濟前景的不確性仍有增無減。

策略上，暫時少做少錯最實際，好似早前千叮萬囑唔好掂的內房股又遭受政策打擊。深圳市再有新政出台，居民家庭新購買商品住房，自取得不動產權利證書之日起計，三年內禁止轉讓。內房股昨日明顯跑輸大市，幾隻大型內房股如碧桂園（02007）、中國恒大（03333）、中國海外（00688）以及華潤置地（01109）跌幅介乎3至7%不等，睇怕有貨者都係繼續逢高減磅，冇貨就唔好多手博反彈！

至於昨日逆市向上的光伏股及教育股又博唔博得過呢？前者主要炒國家能源局重新強調光伏仍是國家重點支持的清潔能源，未來會得到更多支持等，一九年光伏行業相關政策會加快出台。

開放領域勢加劇競爭

雖然見到沉寂已久的保利協鑫能源（03800）同信義光能（00968）分別大升18.7%及10.3%，成交亦見配合，但其他股份成交只屬一般。始終行業發展好大程度受國策消息所左右，一旦轉向便形勢逆轉，故值博率一般。

至於教育股，近期確實有起色，國家領導人在首屆中國國際進口博覽會開幕式指出，中國將在五方面進一步擴大開放，放寬外資持股限制，當中包括教育領域。然而，對內地教育行業卻未必係好事，大家睇睇汽車業就明白，行業逐步開放之餘，同時要面對競爭加劇的後果。故此，教育板塊長遠必須經歷一輪大洗牌，汰弱留強，故古勝認為，教育股宜炒不宜揸。

古勝